Gene Padilla: “Napaluha at napaiyak si Kuya sa mga nangyari.”

Gene Padilla accompanies brother Dennis Padilla (left photo) to niece Claudia Barretto’s wedding to Basti Lorenzo (right photo): “Ngayon lang ako naka-witness ng kasal na di part ng program ang ama ng bride… wala man lang nagsabi na di siya part ng program… Di kasama sa entourage na maglalakad sa gitna papuntang harapan ng altar…”
PHOTO/S: Courtesy: Gene Padilla on Facebook / @mindcl0unds on TikTok / carloDL

Dinepensahan ni Gene Padilla ang nakatatandang kapatid na si Dennis Padilla matapos maglabas ng huli ng kanyang hinanakit sa social media.

Ikinasal ang anak ni Dennis na si Claudia Barretto kay Basti Lorenzo sa St. James The Great Parish sa Ayala Alabang Village, Muntinlupa City, kahapon, April 8, 2025.

Ngunit taliwas sa inaasahan ni Dennis, aniya’y naging “visitor” o guest lamang ang naging trato sa kanya sa kasalan.

Hindi bilang “father of the bride.”

Wala raw siyang naging papel sa wedding ceremony ng anak at ng kanyang bagong manugang.

Himutok ni Dennis sa kanyang Instagram post: “NABUDOL NYO AKO! FATHER OF THE BRIDE NAGING VISITOR. GALING NYO!”

GENE PADILLA DETAILS SAD EXPERIENCE AT NIECE’S WEDDING

Sa kanyang Facebook ngayong Miyerkules, April 9, ibinahagi ni Gene Padilla ang naging karanasan nila sa kasal ng kanyang pamangkin.

Kasama ni Dennis si Gene at ang ina nilang si Catalina Baldivia sa pagdalo sa kasal.

Gene (left) and Dennis Padilla(right) with their mother Catalina Baldivia hours before the wedding of Dennis’s daughter Claudia Barretto. 
Photo/s: Courtesy: Gene Padilla on Facebook

Ayon kay Gene, maaga silang nagtungo sa simbahan dahil “excited” silang masaksihan ang kasal ni Claudia.

Pero nadismaya sila dahil hindi binigyan ng kahit anumang parte sa wedding ceremony ang kanyang Kuya Dennis.

Hindi rin daw sinabihan si Dennis na hindi ito kasama sa entourage na maglalakad sa altar.

Lahad ni Gene (published as is), “Ngayon lang po ako magsasalita…by 1PM nasa church na po ako… galing bulacan going to alabang… simama po namin 5am gumising na excited same kay kuya dennis padilla para sa kasal ng anak niya…

“ngayon lang ako nakawitness ng kasal na di part ng program ang ama ng bride… sa aga namin dun… na nandun mga event organizer wala man lang nagsabi na di siya part ng program… di kasama sa entourage na maglalakad sa gitna papuntang harapan ng altar…”

Nagtanong daw sila sa wedding organizer kung saan sila uupo at pupuwesto, pero sinabihan daw silang kahit saan.

Si Dennis naman daw ay maaaring tumabi sa mga ninong.

Pero nagdesisyon ang magkapatid at ang kanilang ina na sa bandang likod na lamang pumuwesto.

Ayon kay Gene, iniyakan ni Dennis ang nangyari sa loob ng simbahan kaya sinabihan ni Gene na umuwi na sila matapos ng seremonya at matapos magpalitrato kasama ang bagong kasal.

Pagpapatuloy ni Gene (published as is): “nagtanong kami kung san uupo ang nanay namin ang sabi kahit saan dun at yung ama dun na lang DAW sa tumabi sa mga ninong…kaya kami ni kuya dennis pumunta na lamang sa likuran…

“napaluha at napaiyak si kuya sa mga nangyari… kaya sabi ko umuwi na tayo after ng simbahan at papicture na lang sa kinasal…

“naawa din ako sa nanay ko kasi naiyak na rin… naramdaman ko yung sakit na naramdaman ng kapatid at nanay ko dahil ama din ako…”

Kasunod nito ay kinastigo ni Gene ang mga anak ni Dennis sa tila pambabalewala ng mga ito sa ama.

Aniya (published as is): “ang tagal na panahon na nanunuyo at nahingi ng atensyon ama niyo sa inyo mga anak… yan ba itinanim ng mga nakapaligid sa inyo….

“puro kayo karangyaan at kasikatan… sa inyo na lahat yan… sanay kami sa hirap at di talaga kami nababagay sa inyo…

“pero pinag kaiba batin yung puso namin at dignidad di niyo kaya pantayan…kahit magtanong kayo sa ibang magulang tama ba o mali ang ginawa niyo sa tatay niyo???”

Sa bandang huli ng kanyang post ay tinag ni Gene si Dennis, na inilarawan niya bilang “di pala father of the BRIDE! Guest of the BRIDE!!!”

GENE PADILLA FIRES BACK AT NETIZEN

May isang netizen na nagkomento sa post ni Gene.

Kinastigo ng netizen si Dennis na kung nagpakaama sana raw ito sa mga anak.

Makasarili rin daw ito dahil inuuna nito ang kanyang nararamdaman kesa sa maaaring maramdaman ng anak matapos mag-post ng negatibo.

Buong komento ng netizen (published as is): “Hay nako paawa nanaman… Ama nga pero nagpaka-ama ba? Hindi naman maganda relasyon nilang dalawa, patuloy pang inaayos.. The fact na inimbita sya sa isa sa napaka-importanteng araw ng magkasintahan ay isang malaking hakbang na papunta roon.

“Pero hindi nakatiis at nagparinig pa rin talaga sya. Mas inisip pa rin nya ang damdamin nya kesa sa damdamin ng anak nya. Napaka makasarili. Hindi nya maisip kung san sya nagkamali? Mukhang hindi na sya maiimbita sa kasal ng iba pa nyang anak….”

Buwelta ni Gene rito: “wala ka alam sa kabuuan ng mga pangyayari mulat mula wag ka sumawsaw!”

Hinamon din ni Gene ang iba pang netizens na magkokomento ng negatibo na humarap sa kanya, at kanyang ipaliliwanag ang lahat ng pangyayari mula taong 2007.

Saad niya: “Sa lahat ng mga tao dito na magkokomento ng negatibo… kung gusto niyo lahat po kayo harap harapan mag usap at ipapaliwanag ko sa inyo mula 2007 taong naghiwalay”

Sa kasalukuyan ay wala pang inilalabas na pahayag ang mga anak ni Dennis kaugnay ng isyung ito.

Mananatiling bukas ang PEP.ph (Philippine Entertainment Portal) sa panig ng lahat ng nabanggit sa artikulong ito.