Balik-trabaho na ang club disc jockey na si Jellie Aw matapos itong magpagaling mula sa tinamong bugbog at pasa dahil sa away nila ng fiancé na si Jam Ignacio.

Noong March 3, 2025, nag-post si Jellie sa Instagram ng mga litratong kuha sa club na pinagtatrabahuan niya.

Positibo niyang caption, “This is my comeback story. Stronger than ever”

JELLIE AW TO JAM IGNACIO: “ANO GAGAWIN KO?”

Sa kanyang Instagram Story naman kagabi, March 6, ibinahagi ni Jellie ang screenshot ng mensahe ni Jam sa kanya.

Hindi malinaw kung kailan ipinadala ang mensaheng ito, pero mukhang sinusuyo muli ni Jam si Jellie.

Nakasaad ditong ginagawa umano ni Jam ang lahat para maging maayos muli ang relasyon nila, pati sa pamilya ni Jellie.

May pangarap din daw si Jam para bubuin sana nilang pamilya.

Buong mensahe ni Jam (published as is): “Kahit kailan hindi kita kayang lokohin.

“Miski kumausap nang iba hindi ko kaya gawin yan sayo. Bakit mo ako ginaganito.

“Nag mamakaawa ako sayo. Pinipilit ko na maging maayos tayo. Maging maayos tong relasyon natin.

“Nangangarap ako para satin. Para sa pamilya mo na tinuturing ko na din pamilya.

“Bakit mo ako ginaganitp

“Bakit?

“Cge lang jellie

“Cge lang

“Hindi ko na alam. Hindi ko na alam.”

Makahulugang caption ni Jellie: “ano gagawin ko @jamignacio”

A love story TURNED violeNT

July 2024: Napansin ng netizens na nag-unfollow sa isa’t isa sa Instagram sina Jam Ignacio at Karla Estrada.

Bukod sa nag-unfollow-han na sila sa Instagram, burado na rin lahat ng mga larawan nilang magkasama sa kani-kanilang accounts.

Doon na lumutang ang pangalan ni Jellie Aw na bagong karelasyon umano ni Jam.

November 2024: Inihayag ni Jellie ang kanyang pagkabigla sa ginawang proposal sa kanya ni Jam sa mismong kaarawan niya noong November 11.

Kahit apat na buwan pa lang ang relasyon nila, ang mahalaga raw ay kilala na nila ang isa’t isa.

February 12, 2025: ikinagulat ng marami ang post ng kapatid ni Jellie na si Jo Aw kung saan ipinaalam niya sa publiko ang masaklap na sinapit ng kapatid na si Jellie sa mga kamay ni Jam.

Sa Facebook post ni Jo, direkta nitong inakusahan si Jam na siyang may kagagawan sa nangyari kay Jellie.

Sabi nito, hindi niya alam ang dahilan kung bakit “bigla na lang pinagsasapak” at “binugbog” ni Jam ang kanyang ate.

Mabuti na lamang daw at nakasigaw si Jellie sa isang tollgate na kanilang nadaanan at nailigtas ito ng mga pulis.

Lumalabas na nasa loob ng sasakyan sina Jam at Jellie nang mangyari ang insidente.

February 14, Valentine’s Day: nagsampa ng reklamo si Jellie sa National Bureau of Investigation (NBI) kaugnay sa physical abuse na sinapit niya sa fiancé.

February 19: nagpakita sa publiko si Jam sa pamamagitan ng exclusive interview ng 24 Oras.

Dito ay humingi siya ng tawad kay Jellie. Gayundin sa mga kaanak nito at kanilang mga kaibigan.

Nais din niyang ituloy pa rin nila ang pinaplano nilang pagpapakasal sa kabila ng nangyaring pananakit.

February 20: hindi sinipot ni Jam ang NBI kung saan nakatakda sana niyang depensahan ang sarili laban sa akusasyon ni Jellie.

Sa halip, nagpadala na lamang ito ng abogado na si Atty. Oscar Karaan.

Pahayag ng legal counsel ni Jam: “We already sent a letter to the NBI that my client will no longer appear during the hearing to be conducted by the NBI.

“The NBI can just refer the matter to the appropriate fiscal’s office with jurisdiction over the case and then we’ll answer the case that will be filed against my client.”

Gayunpaman, umaasa ang kampo ni Jam na maayos ang gusot na ito sa labas ng korte.

Dagdag pa ng abogado, sinisikap umano ni Jam na magkaayos at magkabalikan sila ni Jellie.

“My client, he is trying to mend with his girlfriend para sana ma-settle ito out of court or out of the fiscal’s office para hindi na humaba kasi pinagpipiyestahan sila sa social media.

“Hindi naman kailangan umabot sa ganung sitwasyon. Dahil usapin ito na puwede naman nilang i-settle between themselves.”

Bagamat sinusubukan ng kanilang kampo na ayusin ito sa pamamagitan ng out-of-court settlement, handa naman daw silang harapin ito kung matuloy ang reklamo sa piskalya.

“Hindi naman porke nagdemanda ka, e, totoo na. Because accusation is not equivalent or synonymous with evidence,” sabi ni Karaan.

Sa mga huling post ni Jam sa Instagram, makikitang nagbakasyon ang negosyante sa Japan.