Ready at excited na ang Kapuso actress na si Jillian Ward, 19, sa bago niyang proyektong pagbibidahan — ang GMA Prime series na My Ilonggo Girl.

Ito ang follow-up project ni Jillian matapos ang matagumpay na afternoon drama series na Abot-Kamay Na Pangarap, na mahigit dalawang taon tumagal sa ere.

Makakatambal niya sa My Ilonggo Girl sa unang pagkakataon ang Kapuso heartthrob na si Michael Sager, 21.

Pagtatapat ni Jillian, malaking bagay ang pagkakataong ibinigay sa kanya ng GMA-7 na muling magbida sa isang serye na mayroong ibang kapareha sa katauhan ni Michael.

Pagbabahagi ni Jillian sa ginanap na medicon ng My Ilonggo Girl noong January 9, 2025, nasa estado na siya ngayon na gustung-gusto niyang mag-explore sa larangan ng pag-arte.

Kabilang na rito ang pagkakaroon niya ng permanenteng ka-loveteam.

Aniya, “Ako po kasi, tingin ko, sa fifteen years ko na rin sa industriya, I think it’s time na rin talaga na magkaroon ako ng leading man talaga.

“Ma-explore ko po yung, kumbaga, pagiging leading lady.”

Mas nagpa-excite pa raw kay Jillian ang pagkakaroon niya ng asawa sa serye nila ni Michael na ibang-iba sa mga role niya noon.

Saad ng Kapuso actress, “Nagulat nga po ako may asawa po ako sa show na ito, so ibang-iba po siya for me.

“Excited po ako na mag-grow pa. Ito po yung nae-enjoy ko talaga yung ganitong klaseng experience.”

JILLIAN ON BEING PAIRED WITH DIFFERENT LEADING MEN

Sa hiwalay na panayam ng PEP.ph (Philippine Entertainment Portal) kay Jillian, naitanong sa kanya ang tungkol sa pagkakaroon ng iba’t ibang ka-loveteam, bago pa ipareha sa kanya si Michael.

Kapansin-pansin kasing hindi kasing-edad ni Jillian ang mga ipinapareha sa kanya.

Katulad na lamang ni Ken Chan, 31, na naging kapareha niya sa Abot-Kamay Na Pangarap.

Tanong ng PEP.ph, “Wala bang ilang factor kapag hindi mo ka-age yung mga pina-partner sa iyo?”

Sagot ni Jillian: “Ako po kasi, kung ano po yung ibigay sa akin ng GMA, tinatanggap ko po talaga. Ginagawa ko po yung best ko bilang isang artista.

“Kasi pagdating naman po sa work field, kumbaga pare-parehas po kami ng goal, which is to create a story, to entertain, and inspire other people.

“Sa mga naka-work ko naman po, kahit may age gap, they’re very respectful naman po. They make me very comfortable.

“Like, kunwari sa isang taping day po, may hindi ako kumportable na moment or something sa eksena, sinasabi ko naman po yon, nagiging open naman po ako.

“So, kumbaga, just doing my job din po. Same lang po talaga kami ng goal for taping days na to just create a story din.”

Hindi maitatangging kakambal ng pagkakaroon ng ka-loveteam ang pagkakaroon din ng kissing scenes sa mga eksena.

Handa na kaya si Jillian para dito?

Natatawa niyang sagot, “Ayan po ang medyo hindi ako kumportable, yang mga kissing scenes.

“Basta sa ngayon po, mas ine-explore ko pa is magkaroon ng lalim pa yung mga character na ginagampanan ko.”

Hindi naman daw ibig sabihin nito ay isinasara na ni Jillian ang posibilidad na magkaroon siya ng ka-kissing scene sa hinaharap.

Sa katunayan, suportado raw ito ng kanyang pamilya.

By choice lang daw sa ngayon ang desisyon ni Jilian na hindi muna tumanggap o pumayag magkaroon ng kissing scenes sa kanyang mga proyekto.

“Actually, yung parents ko naman po, super considerate sila sa nararamdaman ko.

“Kunwari may mga ganun pong eksena, kissing scene, hindi po sa pinapaalam ko sa kanila, kundi more on mine-make sure nila na, ‘Ikaw, kaya mo ba, gusto mo ba?’

“Yung parents ko po kasi, hindi sila mapilit. Kumbaga, kung gusto ko, e, di gawin ko. Kung ayaw ko, huwag kong gawin.

“Sa ngayon, yes, [by choice] po na ayaw ko pa sa kissing scenes.

“More on ang ginagawa ko din po sa career ko is by choice.

“Kumbaga, walang pumipilit sa akin, like my parents and my management, very respectful naman po sila.

“Pinoprotektahan nila ako. They make sure na happy ako sa ginagawa ko.

“Very open din po ako sa kanila na sabihin kung hindi ako kumportable,” pahayag ng young actress.

Sundot na tanong ng PEP.ph, “Factor ba yung dahil una kang nakilala bilang child actress noon sa hindi mo pa pagpayag magkaroon ng kissing scene sa mga eksena mo ngayon?”

Mabilis na sagot ni Jillian, “Yes po, malaking factor siya.

“Kasi, kumbaga, mayroon ngang eksena na super nakakakilig, yung director ko po na naka-work ko pa noong baby pa ako, makatingin.

“Parang sabi ko na lang, ‘Hala, Tatay, ano ba yan, talagang nakatingin ka sa amin ha.’ Nakaka-concious kasi.

“Sabi ko nga po, parang nanay at tatay ko na silang lahat. So, feeling ko pinapanood ako ng nanay at tatay ko, ganun yung pakiramdam.”

Dagdag pa niya, “Ayun din po yung challenge for me na kailangan ko pong mag-step out sa aking comfort zone kasi magtu-twenty na po ako next month, e.

“Kailangan na iba naman po. Iba naman na yung ma-experience ko.

“Kagaya lately, ine-explore ko po ang pagpe-perform, firing, yung mga sports shooting, kasi gusto ko pong matuto pa.”