May mga bagay na bahagi ng talaga ng daily routine ni Marian Rivera.

Alam niyo bang personal niyang inaasikaso ang mga anak tuwing papasok sila sa school?

Siya rin ang naghahatid sa kanyang mga anak na sina Zia, 9, at Sixto, 5.

“Sabihin ko yung routine ko po—gigising ako sa umaga, maliligo ako. Gising ako sa umaga, siyempre may ritual pa akong ginagawa niyan kasi hindi ako puwedeng gumigising na hindi ako nakakundisyon through praying, so iyan ang number one ko.

“After niyan, maliligo ako, gigisingin ko yung dalawang anak ko, papaliguan ko, bibihisan ko sila for school.

“So habang ginagawa nila iyan, mag-e-Ecran na po ako, ‘tapos magba-blush-on na po ako, kasi hahatid ko po sila sa school.

“Pagka-drop ko sa school, nagpi-Pilates po ako, so yun ang aking exercise. Nagpi-Pilates po ako every other day po for one hour.”

Ang binanggit niyang Ecran ay ang silicon sunscreen gel na produkto ng Luxe Beauty and Wellness Group.

Ni-renew ang contract ni Marian nitong January 30, 2025, kasama ang lady boss ng kumpanya na si Anna Magkawas at ang top representatives ng Triple A Management na sina Jacqui Cara, president and CEO Mike Tuviera, at chief financial officer and chief operating officer Jojo Oconer.

Ginanap ang contract-signing ceremony sa Stardust Bar & Lounge, na pag-aari ni Alden Richards, sa Jupiter St. sa Makati City.

MARIAN RIVERA AS AN ENDORSER

Kahit na isa si Marian Rivera sa pinaka-in-demand na celebrity endorsers sa bansa, bilang pa rin ng aktres kung ilan ang kanyang endorsements.

Pagtitiyak niya sa panayam ng PEP.ph (Philippine Entertainment Portal), “Bilang, kasi lahat sila mahalaga sa akin, hindi puwedeng hindi.

“Actually, alam ni Jack iyan, every time mag-e-end of the year… like last year, kailangan kong malaman kung ano yung mga endorsements ko, kasi pinaplano ko siya sa lahat ng gagawin ko, at lahat iyan binibigyan ko ng importansiya kasi lahat iyan ginagamit ko.”

Si Jack o Jacqui Cara ay ang head of Operations and Sales ng Triple A Management na siyang nangangalaga ng showbiz career ni Marian.

Masasabing isa sa mga dahilan kung bakit pinagkakatiwalaan si Marian ng mga kumpanya ay dahil sa paniniwala niyang hindi dapat ituring na negosyo ang pag-eendorso.

Aniya, kasama nito dapat ang pagsang-ayon sa values ng kumpanya at ang tiwala niya sa produkto.

Bilang isa siya sa may pinakamaraming followers, paano niya nagagamit ang kanyang massive influence para maikonek sa mga ini-endorso niya?

Lahad ni Marian, “Siguro through social media, kasi yun talaga yung plataporma naming mga artista para ipaalam dun sa mga nagmamahal at sumusubaybay sa amin kung ano yung mga dapat nilang pagkatiwalaan at ano yung ginagamit talaga namin.”

marian rivera AS AN ACTRESS

Ano naman ang nilu-look forward ni Marian ngayong 2025, partikular sa paggawa pa ng mga pelikula?

“Naku, nilu-look forward? Parang mas gusto ko yung kung ano yung dumating, mas iyon yung pagtutuunan ko ng pansin.

“Minsan kasi parang, walang masamang mag-look forward sa mga bagay at gusto mong marating, mangarap.

“Pero minsan dadating ka sa punto sa buhay mo na nandun yung kuntento ka.

“Ngayon kapag may project na ibibigay sa iyo at may pulso ka dun na parang, ‘A, gusto ko ulit itong gawin,’ parang dun ka magpo-focus.

“Kasi minsan kapag ang dami-dami mong gusto, minsan nawawala yung focus mo sa isang bagay na maganda dapat at pinagtutuunan mo ng pansin.

“So this time ganyan ang gagawin ko. Pipili ako ng project, kung ano yung napupulsuhan ko at ano yung may spark ako, iyon yung gagawin ko.”

Kung papipiliin si Marian, box office or best actress award?

“Both,” at tumawa ang aktres.

“Bawal mamili.”

Pareho niyang nakamit ang dalawa through the movies Rewind, na top grosser sa Metro Manila Film Festival 2023 at pumapangalawa sa listahan ng highest-grossing Pinoy movies of all time, Balota, kung saan niya nanalo ng Best Actress award mula sa 2024 Cinemalaya Film Festival.