Ramdam ang pagiging proud ni Janice de Belen sa kanyang anak na si Kaila Estrada na nakatatanggap ng mga papuri dahil sa galing nito sa action-serye na Incognito.

Ang Incognito ay ang bagong primetime series ng Kapamilya Channel na ipinalalabas din sa Netflix.

“Suntukan naman,” sambit ni Janice tungkol sa bagong genre na tinatampukan ni Kaila.

Bago kasi ito ay napansin na rin ang husay ni Kaila sa mga drama series na Can’t Buy Me Love at Linlang.

Tila pinatunayan nitong “anak nga siya ni Janice” pagdating sa pag-arte.

Ano ang masasabi ni Janice sa sinasabi ng iba na posibleng malampasan siya ng anak pagdating sa pag-arte?

“Okay lang yun. Wala namang problema,” nakangiting sabi ni Janice.

“Ganun naman talaga yung mangyayari kasi siyempre nag-iiba naman yung lugar namin, sila naman yung paganun, pasibol, di ba?

“Malampasan man niya ako, e, ano ngayon, di ba? E, ano ngayon?”

JOHN ESTRADA’S BONDING WITH HIS CHILDREN WITH JANICE DE BELEN

Kumusta naman ang Pasko at Bagong Taon ni Janice?

“Ah, okay naman, tahimik. Like any other days, which is the same sa amin,” sagot ng aktres.

Noong January 2, 2025, nag-post ang ex-husband ni Janice na si John Estrada ng larawan kung saan naka-bonding nito ang kanilang mga anak na sina Inah de Belen, Moria Estrada, Kaila Estrada, at Yuan Estrada.

Kasama rin sa larawan si Anechka Estrada, anak naman ni John sa estranged wife nitong si Priscilla Meirelles.

John Estrada with his children (front to back) Kaila, Moira, Inah, Yuan, and Anechka

Ano ang masasabi ni Janice dito?

“Tatay nila yun, e. Bakit naman hindi magiging okay sa kanila?

“Wala naman akong problema dun ever,” saad niya.

Eksklusibong nakausap ng PEP.ph (Philippine Entertainment Portal) si Janice sa Landers 8th Anniversary Shop & Win grand draw na ginanap sa Arca South branch, Taguig City, noong January 20, 2025.

JANICE DE BELEN ON CHILDREN’S lovelife

Na-engage ang second daughter ni Janice na si Moira noong January 1, 2025.

Ano ang reaksiyon niya ngayong malalaki na talaga ang mga anak nila ni John at handa nang magkapamilya?

Sabi ni Janice, “Hindi, okay lang. Wala naman akong magagawa, di ba?

“Darating naman talaga tayo diyan.”

Tila naunahan ni Moira ang Ate Inah niya?

Sabi ni Janice, “It doesn’t matter. It doesn’t matter, di ba?

“Kanya-kanya yan, e, hindi naman pare-pareho.”

Handa na talaga siyang pakawalan ang mga anak sa kanyang poder?

Diretsong sagot ni Janice, “Ang tatanda na nila, ano?

“Oo naman. Oo naman. Oo naman.

“Basta alam mo, mapapapunta sa mabuti ang anak mo, okay ka naman.”