Lalong tumaas ang paggalang ni Maja Salvador sa mga nanay pagkatapos niyang isilang ang panganay nilang anak ni Rambo Nuñez sa Canada noong Mayo 31, 2024.

Noong Hunyo 1, 2024, ibinahagi ni Maja sa Instagram ang hirap na pinagdaanan niya nang iluwal si Baby Maria Reanna.

Sa renewal ng kontrata niya sa Beautederm nitong Miyerkules, March 26, 2025, muling idiniin ng aktres na malaki ang paggalang niya sa mga kababaihang nagluluwal at nagbibigay ng buhay sa kanilang mga anak.

Nagbigay-pugay rin si Maja sa kanyang ina na nagluwal at nagpalaki sa kanya, at sa kanyang kapatid.

Saad ni Maja: “Ang taas na ng tingin ko sa nanay ko. Kumbaga, nung dati pa lang, saludung-saludo na ako.

“Kasi siyempre single [mother] lang siya, di ba? Tapos ginawa niya lahat para buhayin kaming magkapatid.

“Dun pa lang saludo na ako.

“Pero nung nagkaroon ako ng Maria, kung paano manganak, na-experience ko nang maging mommy, parang, ‘Paano nagawa ng nanay ko tapos dalawa pa kami?’

MAJA SALVADOR’S MOTHER

Bilang isang ina, lagi raw nasa isip ni Maja ang ipinapayo ng kanyang ina.

“Laging mabuting tao ka lang, kasi yun ang makikita at makikita ng anak mo.

“Which is yung nanay ko, sobrang bait nun, sobrang bait.

“Hindi niya kasi kayang magalit. Kahit napupuno na siya, iiyak lang siya,” pagbabahagi ng aktres.

Nagpapasalamat din si Maja sa close friends na nakakausap niya at ibinabahagi ang kanilang karanasan bilang nanay.

Isa na rito si Ms. Rhea Anicoche-Tan ng Beautederm. Parang kapatid na raw ang turingan nilang dalawa.

Ang laging sinasabi ni Rhea sa kanya: “Kaya ikaw, namnamin mo araw-araw, oras-oras.

“Yung mga first niya [Maria] i-record mo lahat. Yung ‘mama’ niya, unang lakad niya, yung ihahatid mo siya sa school.

“Walang kasinsarap maging nanay. Yun yung best na nangyari sa buhay ko, maging isang nanay.”

Magpa-five years nang endorser si Maja ng beauty company ni Rhea.

Sabi pa ni Maja Salvador, nakita ng asawa niyang si Rambo Nuñez ang hirap niya sa panganganak.

Helpless daw noon si Rambo na hindi nito alam kung ano ang puwedeng gawin habang nagle-labor ang aktres.

“May mga ano pa nga ako kay Rambo e, ‘Pag kailangan mong mamili, yung bata, ha?’

“May ganun pa ako,” napapangiting pag-alala ni Maja.

Saad pa niya: “Hindi naging madali, pati si Rambo, yung experience namin… Na-post ko naman po, updated naman kayo sa nangyari.

“Sabi ng asawa ko, if yun nga, kung ayaw ko na raw magbuntis, okay lang, kasi nakita niya yung hirap ko.

“Yung parang ang sabi niya… si Rambo kasi yung laging parang nagagawan niya ng paraan ang lahat. Yung parang may sagot siya sa lahat.

“Pero nung time na yun, sobrang helpless siya, na parang wala talaga siyang magawa. Tapos bitbit niya yung anak namin.

“Tapos, nakikita niya na lahat ng mga nurses and doctors ginagawa ang lahat para maging okay ako.

“Tapos sabi niya, ‘Kung ayaw mo, okay lang, naiintindihan ko.’

“Pagkatingin ko dun sa bassinet, ‘Ay! Gusto ko pa!’

“Ang cute ng anak ko, e!” bulalas ni Maja.