Denni recalls meeting Claudia’s husband Basti three weeks before the wedding.

Dennis Padilla (left) on meeting daughter Claudia Barretto’s (center) husband Basti Lorenzo (right) three weeks before the wedding day: “Pagdating ni Basti, one question, one answer lang talaga siya. What’s your name? Ilan taon ka na? Ilan kayong magkakapatid? Ilang taon na nanay at tatay mo? Yung mga basic questions na yan. Talagang ganon, introvert nga yung tao.”
PHOTO/S: Screengrab from @mindclouds on Tiktok

Muntik na umanong hindi matuloy ang kasal nina Claudia Barretto at Basti Lorenzo noong April 8, 2025.

Ito ang rebelasyon ng ama ni Claudia na si Dennis Padilla sa vlog sa YouTube ng talent manager, actor, vlogger na si Ogie Diaz nang magka-usap sila via phone call nitong Miyerkules, April 9.

Kuwento ni Dennis, umaga noong April 8 ay nakatanggap siya ng tawag mula kay Claudia.

Nangyari ito noong araw mismo ng kasal nina Claudia at Basti.

Dennis Padilla (L) with daughter Claudia Barretto and son-in-law Basti Lorenzo during photo-op after the wedding ceremony 
Photo/s: Screen Grab from @mindclouds on Tiktok

Sa tawag, umiiyak daw na sinabi ni Claudia kay Dennis na hindi na matutuloy ang kasal.

Lahad ni Dennis: “Mga eight [o’clock] ng umaga minessage ko si Claui, sabi ko, ‘I’m so happy for the both of you. More love, chuchuchuchu.’

“Maya-maya konti nagri-ring yung telepono ko, wala pang two minutes.

“Si Claui, sabi niya, ‘Good morning, Pa.’ Sabi ko, ‘Why?’ Sabi niya, ‘I want to tell you something… Pa, hindi na po tuloy ang kasal.’

“Sabi ko, ‘Why, what happened?’ Tapos umiyak. She tried to control it kaya lang noong nagsalita na ako, na medyo nabasag na yung boses ko, umiyak.

“Sabi ko, ‘Why are you crying? What happened ba?

“‘Anyway, huwag mo nang sagutin yung tanong ko. If you’re not happy with it, don’t do it. If you’re not sure with it, don’t do it.’

“Napilitan siyang magsalita [sabi niya], ‘Pa kasi for the past one week hindi ko nakikita yung interes ni Basti na magpakasal kami. Parang hindi siya sure.

“‘Sabi ko, ‘Ay, mahirap yan, anak. Huwag ka nang tumuloy. It’s okay, people will understand. I will understand.’”

Pagkatapos makausap si Claudia, tinawagan ni Dennis ang kanyang ina para ipaalam na huwag na itong magbihis dahil hindi tuloy ang kasal.

Makalipas ang halos isang oras, muli raw tumawag si Claudia kay Dennis para bawiin ang sinabi nitong hindi na matutuloy ang kasal nila ni Basti.

Ani Dennis: “After an hour, exactly 9:30 [A.M] tumawag ulit, ‘Papa, tuloy na yung kasal.’

“Hindi na ako nagtanong masyado kasi 9:30 [A.M] na. Alabang ang wedding, susunduin ko pa sa Caloocan City ang nanay ko. Hindi na sapat yung oras ko, mabibitin na ako.

“So tumakbo na ako, sinundo ko na yung nanay ko.”

Maaga pa raw nakarating si Dennis sa St. James The Great Parish church sa Alabang, sa Muntinlupa City. Kasama niya ang kanyang ina at kapatid na si Gene.

Patuloy ni Dennis: “Awa ng Diyos, wala namang traffic sa Skyway. Bago mag-ala una [ng hapon] nasa tabi na kami ng simbahan.

“Wala pang tao yung simbahan [pumasok na kami] nag-picture taking na kami nina Gene [Padilla] at Mama, sobrang excited ko.”

Dennis Padilla (right) with mom Catalina and brother Gene Padilla (left) at Claudia Barretto’s wedding 
Photo/s: Courtesy: Gene Padilla on Facebook

Hindi alam ni Dennis kung ano ang tunay na dahilan ni Claudia nang sabihin nito noong una na hindi na matutuloy ang kasal.

Sa interpretasyon ng aktor, napadalawang-isip lang si Claudia sa napansing kilos ni Basti ilang araw bago ang wedding day.

Naiintindihan naman daw ito ni Dennis dahil palagay niya ay nakaramdam lang ng nerbiyos si Basti.

Saad ni Dennnis: “Hindi ko alam kung bakit [nasabi yon ni Claudia].

“Ang sabi niya, parang si Basti raw, parang hindi masyado excited for almost a week na kaya parang nagduda na rin siya kung itutuloy pa.

“Siguro, alam mo yon, parang may jitters minsan, baka iyun.”

DENNIS ON MEETING CLAUDIA’S HUSBAND

Sa phone interview ni Dennis kay Ogie ay inalala din ni Dennis ang unang beses na ipinakilala sa kanya ni Claudia si Basti.

Nangyari raw ito noong March 18, o tatlong linggo bago ang wedding day.

Naka-dinner date ni Dennis noon ang tatlo niyang anak na sina Claudia, Julia, at Leon Barretto.

Sina Julia, Claudia, at Leon ay mga anak ni Dennis sa dating asawa na si Marjorie Barretto.

Dennis Padilla with children (L to R) Leon, Claudia, and Julia, with Dennis’s mother, Catalina Baldivia. 
Photo/s: Courtesy: Instagram

Pahayag ni Dennis: “Yung first meeting namin… Sabi kasi ni Claui sa akin, bago pa kami magkita, ‘Pa, okay lang ba na kasama si Basti kapag mineet mo kami nina Julia, Leon at ako?’

“Sabi ko naman, ‘Okay lang ba na tayo muna mag-usap? Tapos after, maybe thirty to one hour, pasunurin mo na lang siya.’

“Sabi niya, ‘Sige Papa.’ So, ganon nga, kami munang apat nag-usap, tapos after 45 minutes, dumating si Basti.”

Bago pa man dumating si Basti sa lugar kunsaan magkakasama ang mag-aaama, binalaan na raw ni Claudia si Dennis sa ugali ni Basti na tahimik ito.

Lahad ni Dennis: “Winarningan na ako ni Claui. Ang sabi niya, ‘Pa, baka manibago ka, introvert si Basti, halos hindi nagsasalita.’

“Sabi ko, ‘Okay, no problem.’ Pagdating ni Basti, one question, one answer lang talaga siya.

“‘What’s your name? Ilan taon ka na? Ilan kayong magkakapatid? Ilang taon na nanay at tatay mo?’ Yung mga basic questions na yan. Talagang ganon, introvert nga yung tao.

“Naiintindihan ko naman na ganon yung pagkatao niya.”

Pero napaisip din daw si Dennis sa ikinilos ni Basti.

“Noong pauwi ako, na-weirduhan ako, kasi dapat kapag makikilala mo yung biyenan mo, dapat ikaw yung makuwento, di ba, para makilala ka?”

Gayunpaman, ipinagwalang-bahala raw ito ni Dennis dahil kung saan at kanino masaya ang anak niyang si Claudia ay handa niya itong suportahan.

DENNIS ON NOT BEING PART OF THE ENTOURAGE

Ipinunto ni Dennis na maganda ang itinakbo ng pagkikita nilang mag-aama noong March 18.

Dito rin daw personal siyang inaya ni Claudia na dumalo sa kasal, kaya umasa siya na kasama siya sa wedding entourage.

Hanggang sa naganap ang pangyayari sa mismong wedding day na labis na nagpasama ng loob ni Dennis.

Sa halip daw kasi na “father of the bride” si Dennis ay naging “visitor” ang trato sa kanya sa kasalan.

Paliwanag ni Dennis: “Ang feeling ko doon sa March 18 dinner, akala ko that was the reunion of love. Ang feeling ko, feeling to, ha?

“The welcome I had doon sa dinner na iyon was so lively and maganda, masarap.

“And then sabi ni Claui, ‘I want you to look good.’ So, ang feeling ko doon sa ‘I want you to look good Papa that day,’ kahit ikaw sabihan ka ng anak mo non anong ibig sabihin non? You look good as a guest ba ang dating sa yo?

“Because of those words” inakala ni Dennis na may parte siya sa wedding ng anak.

Ang ikinasasama pa raw ng loob ni Dennis, walang binanggit sa kanya si Claudia nang magkausap sila sa telepono noong araw ng kasal.

Matatanggap naman daw ito ni Dennis kung nasabihan siya nang maaga.

“Para I can decide if I want to still go o huwag na lang.

“Nasa akin na yon, di ba? Wala na silang carry doon. Kung hindi ako dumating, ‘E, in-invite ka namin, e. Sinabi naman namin na hindi ka part ng entourage.’

“At least, mayroon silang katuwiran, may reasoning sila. Hindi ako puwedeng mag-vent out, kasi sinabihan ka nang wala ka e.”

O kaya ay hindi na lang daw sana siya inimbita, at siya na lang ang boluntaryong pumunta sa kasal para aasahan na niya sakaling hindi siya tratuhing “father of the bride.”

Sa huli, masama ang loob na sinabi ni Dennis na suko na siya sa pakikipaglapit sa mga anak.

Lalo pa’t ilang beses naman na raw siyang sumubok na makipag-ayos sa mga ito.

Hindi na rin daw niya bibigyan ng tsansa ang mga anak na kausapin o makita siya kailanman.

“This is a permanent goodbye,” pinal na sabi pa ni Dennis sa panayam ni Ogie.

“Maybe the last time that you will see me, sa loob na ng kabaong ko yun. Di na ako makakaiwas,” emosyonal na dagdag ni Dennis.

Sabay sabi rin niya, “Di ko naman kayo iba-ban dun. Anak ko kayo, e. Kung gusto niyo mag-donate ng biscuit, puwede rin naman yun.”

Samantala, habang isinusulat ang artikulong ito ay wala pang nagsasalita sa kampo ni Claudia ukol sa issue.

Nagpadala na rin ang PEP.ph (Philippine Entertainment Portal) ng mensahe kay Claudia via Instagram direct message, ngunit hanggang ngayon ay hindi pa rin ito sumasagot.