Idinaan ni Cedrick Juan sa isang matalinhagang liham ang pagmamahal, pasasalamat, at pangako niya sa kanyang asawa na si Kate Alejandrino.

Ito’y matapos nilang ikasal noong February 25, 2025.

Sa Instagram ngayong Sabado, March 1, ibinahagi ni Cedrick ang ilang kuhang larawan at videos nila Kate sa naganap nilang pag-iisang dibdib.

Kalakip ng mga litrato at video ang isang punung-puno ng pagmamahal na mensahe sa kanyang misis.

Ayon kay Cedrick, masaya siyang sa wakas ay natupad na ang pangarap niyang makasama habambuhay ang kanyang minamahal na si Kate.

Ang kanila raw pagpapakasal ay bagong yugto na kanilang tatahaking buhay na magkasama — sa hirap man o saya.

Mababasa sa caption ng award-winning actor: “Mahal…Masaya akong maibalik sa iyong mga mata ang pinangarap ko lang noong nagsimula tayo.

“Ngunit alam kong hindi ito natatapos sa pagiisang dibdib. Tuloy-tuloy na pagsisikap dapat ito, kung pumalya man ay babalikan ko ulit ang mga rason kung bakit ako nangarap.

“Panibagong yugto ito ng ating buhay. Ang yugtong mas nagpabuklod sa ating pagsasama, pagkakaibigan at pagmamahalan.

“Saksi ang ating mga pamilya, kaibigan, ang diyos at uniberso sa pagiisang dibdib natin.”

CEDRICK’S PROMISE TO KATE

Alam daw ni Cedrick na darating at darating ang panahong magkakaroon sila ng hindi pagkakaintindihan ni Kate.

Sa kabila nito, pangako ni Cedrick na hindi siya mapapagod na sumuyo, magpakumbaba, at alalahanin kung gaano niya kamahal ang kanyang kabiyak.

Saad niya: “Habang buhay na bigayan, suyuan, aso’t-pusang argumento at hindi pagkakasunduan. Pero pipiliin ko pa ding ikaw ang makasamang magresolba.

“Ang klase ng pagmamahal mo ang nagudyok sa akin na mas pagbutihin pa ang pagiging tao ko.

“Ang huwag matakot magsalita ng tunay na nararamdaman, masakit man o magiging masaya man. Ang mahalaga ay totoo sa sarili at pakay.”

Sa huli, nagpasalamat si Cedrick sa dalang inspirasyon sa kanya ni Kate na maging totoo at mabuting tao.

“Salamat sa pagtanggap, sa inspirasyong mas maging sigurado sa salita at galaw, sa pagyakap sa klase ng pagmamahal na kaya kong ibigay at sa pag-oo na maging katuwang habang buhay.

“Pipiliin ka araw-araw, Pagtatrabahuhan bawat saglit at Mamahalin ka bawat yugto ng ating buhay.”

CEDRICK-KATE ENGAGEMENT

Ikinagulat ng mga tagahanga nina Cedrick at Kate ang kanilang pagpapakasal.

Nangyari ito makaraan lamang ang halos dalawang linggo mula nang isapubliko nila ang kanilang engagement.

Pasado alas dos ng madaling-araw noong February 18, 2025 nang mag-post sa Instagram si Cedrick ng madamdaming liham para ianunsiyo ang pagpayag ni Kate nang alukin niya ito ng kasal.

Sabi nito: “Pangarap na nagsimula sa pagpapanumbalik ng iyong tunay na ngiti na naguugat sa kaluluwa, isip, puso at mga mata. Ito ang layunin ko simula noong unang araw na tayo’y nagsimula.

“Trabaho ko ang mahalin, pagsilbihan, makinig at pasayahin ka dahil nararapat ito para sayo. Ang maging sigurado at tiyak sa bawat hakbang araw-araw na magkasama.

“Tara mangarap tayo bawat sandali simula sa araw na ito.

“Mahal, Mahal na mahal kita at pipiliin ka araw-araw Kaitin.”

Kalakip ng post ang carousel na may kasamang video ng proposal ni Cedrick kay Kate.

Nakaupo lang sila sa isang bench at masinsinang nag-uusap.

May mga litrato rin ang couple kunsaan ipinakita ni Kate ang suot niyang engagement ring.

CEDRICK ON FALLING FOR KATE

Samantala, noong October 29, 2024 nang unang magpahiwatig si Cedrick ng ugnayan nila ni Kate.

Mayroong solo picture si Cedrick kunsaan tinag niya si Kate na siyang kumuha ng litrato.

“When words fail, our eyes speak,” waring kinikilig na caption ng aktor.

Hanggang noong January 1, 2025, nang maging Instagram official ang dalawa.

Nag-post si Cedrick ng sweet picture nila ni Kate kalakip ng makatang love letter niya sa kanya noong nobya.

Bihirang mag-post si Cedrick sa social media kaya marami ang natuwa nang mag-update siya tungkol sa kanyang lovelife.

Dito ay idineklara ni Cedrick na natagpuan niya kay Kate ang isang “katuwang” na nagbibigay sa kanya ng kasiguraduhan sa buhay.

Mababasang mensahe noon ni Cedrick (published as is):

“Bago matapos ang unang araw ng taon na ito, gusto ko lang magpasalamat sayo. Sa mga bagay na itinuturo mo sa akin araw-araw, kung paano maging sigurado sa bawat desisyon na kailangan gawin sa buhay. Dahil ang desisyon na sigurado, sadya at pinagisipan ay magdudulot ng mas malinaw na resulta na siyang makakatulong sa mas matibay na kinabukasan.

“Maraming salamat sa klase ng pagmamahal na binibigay mo. Bago ito sa akin, Pero sapat ang rason ng bawat argumento, tamang pakikinig at gawa para yakapin ang pagbabagong idinudulot nito sa araw-araw nating pinagsasamahan.

“Hiling ko ang mas malalim pa na pagkilala, tiwala at pagpili sa isa’t-isa araw-araw. Salamat aking katuwang sa buhay.”

“Mahal na mahal kita Kaitin.”