Kung matutuloy ang plano ni Alden Richards na mag-aral ng pagpapalipad ng eroplano sa isang aviation school sa Clark, Pampanga ngayong taon, siya ang magiging karagdagan sa listahan ng mga artistang nagsumikap para maging piloto, gaya nina Ian Veneracion at Xian Lim.

Natupad na ni Alden ang pangarap ng sumakabilang-buhay niyang inang si Rosario Faulkerson na maging artista siya.

Ngayon naman, nais ni Alden na siya ang magpatuloy sa hindi nangyaring pangarap ng tatay niyang si Richard Faulkerson Sr. — ang maging isang piloto.

“Kung yung nanay ko, kasi nga, ang gusto talaga [para] sa akin ay mag-artista at mag-showbiz, yung pagtatapos naman po ng school ay pangarap ng tatay ko for me.

“So, I think dun sa part na pag-fulfill sa pangarap ng nanay ko, medyo accomplished na po tayo.

“So, dun sa part naman ng pag-fulfill ng pangarap ng dad ko para sa akin, gusto ko yon.”

fulfilling his dad’s dream to become a pilot

Ibinahagi ni Alden na may nakausap na siyang aviation school na magbibigay sa kanya ng scholarship para sa pagtupad nito.

Lahad niya: “And right now, siguro puwede ko nang i-share na meron pong nag-oo since I’ve been very vocal about being a pilot.

“So, there’s an aviation school in Clark [Pampanga], na nag-offer ng scholarship for me to be a pilot.

“Captain Alden at your service, so sobrang excited rin ako.

“Saka ko na lang po idi-discuss kung sinong nag-offer ng scholarship once it’s final already.

“But I am very excited with that. It has been my dad’s dream also.

“Personal dream niya actually to be a pilot. So sabi ko, ‘Sige, Dad, since medyo 58, 59 [years old] ka na, ako na lang.’

“So I am really excited for that.

“Hopefully kung kaya this year, matapos ko yung course, lilipad-lipad na tayo.”

Kung saka-sakali, isa na naman itong achievement para kay Alden dahil accomplished actor at businessman na siya sa edad na 33.

ALDEN AS A PILOT IN “GOD GAVE ME YOU”

Minsan nang naranasan ni Alden gumanap na piloto at magsuot ng pilot uniform.

Ito ay sa pamamagitan ng “God Gave Me You,” ang Holy Wednesday Lenten presentation ng Eat Bulaga! noong Marso 23, 2016.

Tinanong ng Cabinet Files si Alden kung wala siyang takot sa paglipad o fear of flying.

“Wala, wala po,” mabilis niyang sagot.

“Nag-skydive nga po ako sa Dubai, e. As in mahilig po ako sa matataas na lugar.

“It gives you a bird’s eye view of everything. Parang figuratively speaking, it gives you… ine-eject ka niya sa mundo kapag nasa itaas ka.

“So, yeah, I love to fly. Let’s go!”

Nagkuwento si Alden tungkol sa pangarap nitong maging piloto sa contract signing nila nina Boss Vic del Rosario at Vincent del Rosario para sa business partnership ng kanilang mga kompanya, ang Viva Group of Companies at Myriad Entertainment Corporation, noong Huwebes, Marso 27, 2025.