Puno ng pagmamahal na inanunsiyo ni Cedrick Juan ang engagement nila ng nobyang si Kate Alejandrino.

Si Cedrick ay bida at nagwaging Metro Manila Film Festival 2023 best actor para sa kanyang pagganap sa pelikulang GomBurZa.

Si Kate ay napabalitang bibida sa upcoming theater production ng Anino Sa Likod Ng Buwan, ang award-winning play at film ni Jun Robles Lana.

Ngunit sa hindi pa sinasabing dahilan, pinalitan si Kate ni Elora Espano sa play kung saan tampok din sina Martin del Rosario at Ross Pesigan.

Makata ang open letter ni Cedrick para kay Kate.

Base ito sa Instagram post ng aktor pasado alas dos ng madaling-araw nitong Miyerkules, February 18, 2025.

Sabi rito: “Pangarap na nagsimula sa pagpapanumbalik ng iyong tunay na ngiti na naguugat sa kaluluwa, isip, puso at mga mata. Ito ang layunin ko simula noong unang araw na tayo’y nagsimula.

“Trabaho ko ang mahalin, pagsilbihan, makinig at pasayahin ka dahil nararapat ito para sayo. Ang maging sigurado at tiyak sa bawat hakbang araw-araw na magkasama.

“Tara mangarap tayo bawat sandali simula sa araw na ito.

“Mahal, Mahal na mahal kita at pipiliin ka araw-araw Kaitin.”

Kalakip ng post ang carousel na may kasamang video ng proposal ni Cedrick kay Kate.

Nakaupo lang sila sa isang bench at masinsinang nag-uusap.

May mga litrato rin ang couple kunsaan ipinakita ni Kate ang suot niyang engagement ring.

Sa comments section, bumuhos ang best wishes at congratulatory messages sa engagement nina Cedrick at Kate.

Karamihan sa kanila ay malalapit na kaibigan at katrabaho na lubos ang saya sa umpisa ng journey to forever ng dalawa.

CEDRICK JUAN ON FALLING FOR KATE ALEJANDRINO

October 29, 2024 nang unang magpahiwatig si Cedrick ng ugnayan nila ni Kate.

Mayroong solo picture si Cedrick kunsaan tinag niya si Kate na siyang kumuha ng litrato.

“When words fail, our eyes speak,” waring kinikilig na caption ni Cedrick.

January 1, 2025 nang maging Instagram official ang couple.

Nag-post si Cedrick ng sweet picture nila ni Kate kalakip ng makatang love letter para sa dalaga.

Bihirang mag-post si Cedrick sa social media kaya marami ang natuwa nang mag-update siya tungkol sa kanyang blooming lovelife.

Idineklara ni Cedrick na natagpuan niya kay Kate ang isang “katuwang” na nagbibigay sa kanya ng kasiguraduhan sa buhay.

Ang buong mensahe noon ni Cedrick (published as is):

“Bago matapos ang unang araw ng taon na ito, gusto ko lang magpasalamat sayo. Sa mga bagay na itinuturo mo sa akin araw-araw, kung paano maging sigurado sa bawat desisyon na kailangan gawin sa buhay. Dahil ang desisyon na sigurado, sadya at pinagisipan ay magdudulot ng mas malinaw na resulta na siyang makakatulong sa mas matibay na kinabukasan.

“Maraming salamat sa klase ng pagmamahal na binibigay mo. Bago ito sa akin, Pero sapat ang rason ng bawat argumento, tamang pakikinig at gawa para yakapin ang pagbabagong idinudulot nito sa araw-araw nating pinagsasamahan.

“Hiling ko ang mas malalim pa na pagkilala, tiwala at pagpili sa isa’t-isa araw-araw. Salamat aking katuwang sa buhay.”

“Mahal na mahal kita Kaitin.”