Permanent resident na ng Germany ang dating sexy actress na si Piel Morena.

Si Piel ay nagbida sa mga pelikula ng FLT Films mula 1998 hanggang 2001.

Tinalikuran ni Piel ang showbiz dahil sa mga pinagdaanan niyang pagsubok at nagmahal siya nang husto sa kapwa babae na mas matanda sa kanya.

Sa eksklusibong panayam ng PEP.ph (Philippine Entertainment Portal) kay Piel, sa pamamagitan ng video, noong Martes, Pebrero 25, 2025, nagbalik-tanaw siya sa nakaraan — ang pag-uumpisa ng kanyang acting career at mga hindi niya malilimutang karanasan bilang artista.

THE ORIGIN OF THE SCREEN NAME PIEL MORENA

Baby Rose Romano Cortez ang totoong pangalan ni Piel.

Pero ang ginagamit niyang apelyido ngayon ay ang apelyido ng kanyang estranged German husband.

Pagkatapos nito ay ikinuwento ni Piel sa PEP kung ano ang pinanggalingan ng kanyang screen name.

“My screen name, Piel Morena, galing sa song ni Thalia, ang Mexican actress na sumikat noon sa Pilipinas dahil sa telenovela na MariMar.

“Nung time kasi na kinuha ako na contract star ng FLT Films, hindi pa ako artista noon.

“But Mommy Rose, she’s training me to be an actress, I stayed with her.”

Ang tinutukoy ni Piel na “Mommy Rose” ay ang dating producer ng FLT Films na si Rose Flaminiano.

Inilagaan at itinuring daw siya noon ni Mommy Rose na sariling anak kaya naging mahigpit ito sa kanya.

Pagpapatuloy ni Piel: “She had no idea about Thalia, but ako, number one fan ako ng MariMar.

“Nang magkaroon si Mommy Rose ng ticket para sa concert ni Thalia sa Manila, isinama niya ako at naging instant fan din siya ni Thalia.

“Nag-karaoke kami sa bahay niya sa Panay Avenue, pinakanta niya ako.

“Sabi ko sa kanya, pinag-aralan ko ang kanta ni Thalia, at ‘Piel Morena’ ang kinanta ko noon.

“So, nagkaroon siya ng idea na Piel Morena ang gamitin kong screen name.

“Ako raw ang ‘MariMar of the Philippines’ dahil kaya kong kantahin ang songs ni Thalia.”

May iba pa raw screen names na naisip noon si Mommy Rose para sa kanya.

Pagbabalik-tanaw ni Piel: “Ang screen names na ibinibigay sa akin noon, Pia Paula, kasi uso noon ang double letter na name.

“Or Annabelle Gutierrez dahil nga kamukha ko raw si Ruffa Gutierrez.

“Inisip nila ang Annabelle Gutierrez para maging kontrobersiyal kapag, halimbawa, nag-react si Miss Annabelle Rama.

“But hindi niya ako matawag with those names, until yung isang reporter, tinawag ako na ‘Miss Piel Morena’ dahil nga palaging naririnig niyang kinakanta ko yung ‘Piel Morena.’

“That’s it, simula noon yun na ang naging screen name ko.”

Ang “Piel Morena” — na ang direct English translation of “Brown Skin” — ay ang title track ng debut album ni Thalia na pinamagatang En extasis, na ini-release noong August 1995.

PIEL MORENA’S MOVIES AND TV GUESTINGS

Ikinuwento ni Piel na hindi siya na-discover ng FLT Films kundi siya mismo ang nag-apply sa movie outfit ni Mommy Rose, noong 1996, para matupad ang pangarap niyang makapasok sa showbiz.

Lahad ng dating aktres: “Hindi naman ako na-discover ng FLT Films, nag-apply ako na artista on my own.

“That was around 1996, katatapos ko lang ng high school noon.”

Sa pagkakaalala ni Piel ay nakagawa siya ng sampung pelikula sa ilalim ng FLT Films at ng sister company nitong Scorpion Films.

Kabilang dito ang Ibigin Mo Ako, Mahalin Mo Ako (1998); Kabiyak 2 (1998); Campus Scandal (1998); Tulak ng Bibig, Kabig ng Dibdib (1998); Hamog Sa Magdamag (1998); Ako’y Ibigin Mo Lalakeng Matapang (1999); Senswal: Bakit Masarap ang Bawal (2000); Virgin Wife (2001); Tabi Tabi Po (2001); at Carta Alas, Huwag Ka Nang Humirit (2001).

Marami rin daw siyang guest appearances sa mga sitcom ng ABS-CBN at GMA-7.

“MASAKIT” NA KARANSAN

Inilunsad si Piel bilang ganap na aktres noong 1998 sa pamamagitan ng pelikulang Ibigin Mo Ako, Mahalin Mo Ako.

Isa raw ito sa mga proyektong hindi malilimutan ni Piel dahil sa kanyang literal na “masakit” na karanasan.

Salaysay niya: “May mga scene na hindi naging masaya si Mommy Rose so I had to undergo liposuction dahil, as a teenager, marami akong baby fats.

“Talagang chubby ako, yun ang built ng katawan ko. Wala kang magagawa.

“Pinapayat ako through crash diet at liposuction.

“So, nung time na yon, gusto ni Mommy Rose na mag-reshoot ng ibang eksena.

“Nasa Manila ako noon, I was trying to rest kasi talagang bugbog pa ang katawan ko, kasi yun ang old way of liposuction.

“Talagang may tube na ipinapasok sa loob ng skin to suck the fats. Parang vacuum yon so bugbog ang katawan ko.

“Kailangan kong umuwi ng Tarlac to do the reshoot and then, yung driver ng sasakyan, dahil wala pa yung proper bridge, dumaan kami sa river na maraming rocks.

“Nakalimutan niya [driver] na bagong liposuction ako.

“Kasama namin noon ang kapatid ni Mommy Rose, si Tita Norma.

“Tinitiis ko yung sakit. Pero tahimik lang ako kasi parang nasanay ako kay Mommy Rose na kailangan mong tiisin ang lahat ng mga bagay-bagay.

“Napansin ni Tita Norma, sabi niya, ‘Masakit ba? Bakit hindi ka kumikibo?’

“Sinabihan niya yung driver na magdahan-dahan kasi nga sobrang sakit, hanggang sa tumutulo na talaga yung luha ko.

“The next day, hindi kami nakapag-shoot dahil sa bugbog sa abdomen ko. Nagkaroon ng pasa, very dark.

“I had to wait for two days para mawala yung purple na pasa at makapag-shoot.”

PIEL MORENA QUITS SHOWBIZ IN 2001

Taoong 2001 nang talikuran ni Piel ang showbiz dahil sa maraming dahilan, kabilang na rito ang pakikipagrelasyon sa isang married woman na 13 years ang tanda sa kanya.

Ipinagtapat ni Piel na sinuspinde siya ng FLT Films dahil sa mga personal na isyu kaya napilitan siyang magpahinga mula sa pag-aartista.

Lahad niya: “Nag-quit ako sa showbiz noong 2001? Why?

“There were a lot of reasons.

“Nagpatung-patong ang dahilan ko at nandoon na ako sa point na I was considering na mag-quit.

“Ang naging trigger point, I fell in love with a woman who unfortunately was married.

“Although nung nag-meet kami, her marriage was rocky, at nandun na siya sa point na gusto na rin niyang makipaghiwalay.

“So, I thought, magkakaroon [kami] ng pag-asa…

“I was so young, around 20 years old, and the woman was around 33 years old.

“I was so immature. I really want to be with her.”

Dagdag pa ni Piel: “Siyempre, sa sitwasyon ko with Mommy Rose at sa showbiz noon, masyado akong controlled.

“Masyadong istrikto si Mommy Rose, we lived in the same condo building.

“So, lahat ng kilos ko was being watched. I had no freedom, hindi talaga ako makalabas, hindi ako makakilos the way na gusto ko.

“So, I decided na it’s time to quit.”

LIFE AFTER SHOWBIZ

Hindi naging madali para kay Piel ang pagtalikod sa showbiz dahil nahirapan siyang maghanap ng trabaho.

Hindi rin naman nagtagal ang relasyon nila ng babaeng minahal niya nang higit pa sa kanyang propesyon noon.

“After quitting showbiz, it was a hard life for me,” pag-amin ni Piel.

“Hindi naman nag-work out ang relationship ko with that woman.

“Limited ang work ko na puwede kong magawa. Anywhere I go, kilala ako as Piel Morena.

“Hindi ako basta-basta makagawa ng work na hindi ako mama-mock ng mga tao.”

Paglilinaw ni Piel: “Actually, I don’t care about the mocking.

“Parang it’s so hard na every day, kailangan mong harapin ang questions ng mga tao, ‘Bakit kailangan mo ng normal work?’

“Ang thinking kasi ng mga tao, I should be wealthy because marami akong pelikula na nagawa.

“But of course, hindi naman nila alam ang mga pinagdaanan ko noon sa show business, especially under Mommy Rose.

“Ang hirap mabuhay na, every day, kailangan mong mag-explain.

“Even if I don’t want to explain, hindi rin naman ako titigilan ng mga tao.

“Ang mga simpleng work na nakukuha ko, sa mga fiesta.”

PIEL ALLEGEDLY BLACKLISTED BY MOMMY ROSE

Ayon pa kay Piel, hindi siya makagawa noon ng pelikula pagkatapos umalis sa FLT Films dahil blacklisted siya kay Mommy Rose.

“I was not able to go back doing films kasi blacklisted ako ni Mommy Rose.

“Nung nag-quit ako talaga, isa sa mga sinabi ni Mommy Rose, I should not use the name Piel Morena anymore because idea niya yon.

“And I said, yes, I will not use Piel Morena. That’s why napaka-limited ng mga bagay na puwede kong gawin after I quit showbiz.

“Of course, it made my life hard but, eventually, I decided to go to Japan katulad ng ibang mga artista na nagpapahinga sa showbiz.

“That’s what I did and dun ako naka-recover nang konti,”

Naranasan daw ni Piel na maging Uber driver sa Pilipinas, nagmahal, nag-aral, at nagplanong bumalik sa showbiz.

Mababasa ang pagpapatuloy ng kuwento niya sa ikalawang bahagi ng ekslusibong panayam sa kanya ng PEP.