Relate na relate ang Kapuso actor na si Kelvin Miranda tuwing may napapabalitang kasamahan niya sa showbiz industry na nahaharap sa kontrobersiya.

Partikular na ang mga balita tungkol sa cheating o panloloko sa isang relasyon.

Dahil katulad ng mga ito, minsan na ring pinag-usapan si Kelvin nang masangkot siya sa isang pinakamalaking isyu noong 2023 — ang cheating allegation ng kanyang ng ex-girlfriend.

January 6, 2023 nang umalma ang non-showbiz ex-girlfriend ni Kelvin na si Roselle Vytiaco tungkol sa pangangaliwa umano sa kanya ng Sparkle artist.

Ang Kapamilya actress na si Kira Balinger ang itinurong ibang babae umano ni Kelvin habang sila pa ni Roselle.

Sa panayam ni Kelvin sa Fast Talk With Boy Abunda nitong Huwebes, February 13, 2025, naitanong sa kanya ng host na si Boy Abunda kung ano ang pananaw niya sa kontrobersiyang kinaharap nina Andi Eigenmann. at Philmar Alipayo.

Lalo na’t sa usapin ng pagkakaroon ng matching tattoo ni Philmar sa girl bestfriend nitong si Pernilla Sjoö, gayong nagsasama na ang surfer at si Andi.

Kaugnay nito, hindi naiwasang halungkatin ni Boy ang nagdaang kontrobersiya ni Kelvin na may kinalaman sa cheating.

Tanong ni Boy kay Kelvin, “I know you got involved in the controversy related to cheating. Paano mo nalampasan yon and what you would want to tell us about this?”

Ayon sa Encantadia Chronicles: Sang’gre star, wala naman siyang ibang puwedeng gawin kundi tanggapin na lang iyon nang maluwag sa dibdib.

Alam daw ni Kelvin na nauna na siyang husgahan kaya’t anuman ang kanyang sasabihin ay hindi na ito paniniwalaan.

Saad niya: “Tinanggap ko lang po yung katotohanan sa sarili ko.

“Kasi wala naman akong dapat ipaliwanag kasi alam ko yung totoo.

“And hindi ko kailangan ipagtanggol yung sarili ko sa taong — ang hirap magsalita, e — sa taong alam niya kung hanggang saan ako at hanggang saan yung kaya kong ibigay.”

Ayon pa kay Kelvin, hindi naman lalala ang kanilang sitwasyon noon kung hindi ito dumaan sa social media.

“Umabot doon sa punto na, wala, online world na ngayon.

“So, konting conflict, konting misunderstanding, kayang palakihin, kayang lumala, lalo’t sa samu’t saring pagsasawsaw ng mga tao sa social media.”

KELVIN MIRANDA’s PAST ISSUE WITH KIRA BALINGER

Nauna nang sinabi ni Kelvin noong May 2024 na walang katotohanang may relasyon sila ni Kira.

Taliwas ito sa sinasabi ng dating nobya ng aktor na si Roselle Vytiaco.

January 6, 2023, direktang pinangalanan ni Roselle si Kira bilang third party umano sa relasyon nila ni Kelvin.

Naglabas pa siya ng “resibo” ng exchange of flirty messages umano nina Kelvin at Kira, na nagkatambal sa pelikulangPoon.

Ayon sa kuwento ni Roselle, December 11-19, 2022 nang magkasama sina Kelvin at Kira sa lock-in shoot, at saka nagkaroon ng komunikasyon via Instagram direct message.

Nag-viral ang screenshots ng mga usapan nina Kira at Kelvin dahil isinapubliko iyon ni Roselle.

KIRA on being dragged into Kelvin’s cheating issue

March 21, 2023, nagsalita si Kira kaugnay sa isyu nang makapanayam siya ng PEP.ph (Philippine Entertainment Portal).

Dito ay hiindi umatras si Kira nang tanungin sa isyung pinaratangan siyang third party.

“Hindi po ako third wheel,” kalmado pero mariing paninindigan ni Kira.

“Kung anuman naging usapan nilang dalawa ng ex niya, out na po ako dun.

“If there’s somebody Ate Girl should talk to, it should be him,” diin ni Kira patungkol kina Kelvin at Roselle.

Ayon pa kay Kira, hindi niya alam na may karelasyon si Kelvin nang makipagkilanlan siya sa Kapuso actor.

“Pero ako, from woman to another woman, I understand that pain, ‘Uy, ba’t may ganyan?’

“Pero honestly, from my point of view, wala akong alam.

“And I can confidently say hindi ako kabit, gaya ng sinasabi ng lahat, like what she made me out to be.

“So, wala po akong alam.”

Nilinaw rin ni Kira na walang namagitan sa kanila ni Kelvin liban sa palitan nila ng mga mensahe.

Aniya, “To be fair, hindi kami. Chats lang yun.

“Ni minsan, ni minsan di kami lumabas together.

“In the lock-in, we had our PAs. It was always, after the set, sleep, done.”

KIRA SAYS KELVIN APOLOGIZED TO HER

Inamin ni Kira na nagalit siya kay Kelvin dahil nadawit siya sa kontrobersiya nang wala raw siyang kalaban-laban.

Totoong nag-chat sila ni Kelvin, pero hindi naman daw niya alam na may girlfriend ito noong panahong iyon.

Saad niya: “Of course. Yeah, honestly, ayoko po talaga ng ganun. Ayoko po talaga ng ganung issue.

“Honestly, homebody po ako. I don’t even go out with my friends.

“So, to be dragged into a situation like that na wala naman po akong ginagawa, I’m just working.

“So, parang, I felt it was very unfair that I was dragged like that on social media.”

Tinanong ng PEP.ph kung humingi ng paumanhin si Kelvin kay Kira matapos siyang madawit sa isyu ng magkasintahan.

Sagot ni Kira, “Siyempre po may sorry, nadamay ako sa ano nila. Pero, stuff happens, unfortunately.

“Pero I did not break them up. And I’m very confident to say that.”

Hindi raw siya ang tipong kailangang mang-agaw ng lalaki.

Mariing sabi ni Kira sa PEP.ph: “Coz I do not steal men, I don’t run after them, they come to me.”

Kira forgives Kelvin

Hanggang noong May 13, 2024, isinapubliko ni Kira na napatawad na niya si Kelvin sa pagkakadawit ng kanyang pangalan sa isyu ng aktor at ng ex-girlfriend nito.

Naungkat ang isyu nang magkasama sina Kira at Kelvin sa pelikulang Chances Are, You And I.

Diin dito ni Kira, maling-maling akusahan siya sa kasalanang hindi naman daw niya kailanman ginawa.

“Of course, I think it was unfair,” prangkang saad ni Kira.

Dagdag pa niya: “Those were private conversations and never meant to be smeared in the Internet in the first place.

“Siyempre when I was first interviewed about it, I was upset.

“But ngayon, the water is not boiling anymore, maayos na, nakapag-move on na kaming lahat.

“Pero masaya na, I’m okay.”

Patuloy ni Kira: “I can say that, of course, may learning na nangyari from that.

“Everything happens for a reason. It made me a stronger person and I chose to forgive.”

Ayon kay Kira, na-appreciate niyang personal na humingi ng tawad sa kanya si Kelvin.

Umiwas ba siya kay Kelvin noon?

Sagot ni Kira, “Siyempre, on my part, like I’ve said before, I was not aware. It was not made clear to me na may something nga sila.

“I didn’t know about it kaya that’s what happened.

“They deserve nothing but the best from us, no matter what happened.”