Matapos ang lagpas isang taong pananahimik sa kanyang social media accounts, muling nagparamdam ang dancer at toy collector na si Yexel Sebastian sa publiko nitong Biyernes, January 31, 2025.

Sa dalawang magkakasunod niyang posts, muling pinabulaanan ni Yexel na nila ng partner niyang si Mikee Agustin ang investors sa kanilang sinalihan noong PHP200-M investment scam.

YEXEL SEBASTIAN, MIKEE AGUSTiN: THE INVESTMENT SCAM ISSUE

Idinadawit sina Yexel at Mikee sa maraming reklamo kaugnay ng PHP200-million investment scam.

Kahit nagpaliwanag na si Yexel sa isang post tungkol sa isyu, na legit ang casino junket na dinaluhan nila at sila ay invited guests lamang, wala itong sinabi kung saan napunta ang mga pera ng OFWs na nakipagsosyo sa kanila.

Naengganyo ang mga OFW na mag-invest dahil sa mga litrato nina Yexel at Mikee sa harap ng bultu-bultong pera at naniwala sa matamis na pangakong kikita sila ng limang porsyento (5 percent) kada buwan.

Nalaman ng publiko ang diumano’y PHP200 million investment scam na kinasasangkutan nina Yexel at Mikee nang lumantad ang mga investor na lumapit sa public service program ni Senator Raffy Tulfo.

Sinabi ng complainant na si Amal Rosaroso, dating co-host ng Wowowin, kay Tulfo na isang milyong piso ang minimum investment na sinabi at hiningi sa kanya ni Yexel.

Lahad ni Rosaroso, “Sabi nila, one million [pesos] yung minimum para makapag-invest dahil may five percent na interes.

“In-ask ko po sila kung may contract. Sabi nila, meron naman po.

“Nag-send po ako ng pera through bank ni Miss Mikee. Late na po nila ipinadala yung kontrata, contract of loan po.

“Ang sabi niya, may kontrata po, pero hindi nila sinabi na contract of loan. Ang ibinigay po nila, naka-notarized na yung papel.

“Nag-ask ako kay Ma’am Mikee bakit contract of loan. Sabi nila, pare-parehas lang daw kami ng contract. And then, sabi nila, yung investment saka contract of loan, e, iisa lang po daw.

“Kami pong mga first timer na nag-invest, akala po namin, ganoon. Yun ang mali namin. Dapat pala, nagtanong muna kami pero kasi naniwala kami.”

Nang tawagan ni Tulfo si Yexel sa telepono, sinabi nitong investor din siya at si Mikee.

Paliwanag ni Yexel, “In-explain ko naman po sa kanila na ako rin po talaga, kami ni Mikee, investor din po kami talaga.

“Kumbaga, nagandahan din po kami sa platform kaya po nag-post kami sa social media namin na kung sino ang mag-invest din, mag-invest din po sila.

“Ito po kasing investment na to ipinasok sa casino junket [operations].

“In-explain ko po sa mga tao na hindi po ako ang may-ari nito. Yan po ay pag-aari ni Hector Pantollana. Siya po yung signatory.

“HP Horizon po yung junket [name] niya before.”

Iginiit ni Yexel na nagpakuha lamang sila ni Mikee ng litrato sa harap ng bulto-bultong pera pero hindi sila ang nagmamay-ari nito.

Naka-block din daw sila sa social media accounts ng magkarelasyon, at hindi nila kilala ang Hector na tinutukoy ni Yexel.

YEXEL SEBASTIAN: “Wala po kaming Warrant of arrest at hindi po kami wanted.”

Sa Instagram at Facebook kahapon, January 31, 2025, nagbahagi ng dalawang mahabang post si Yexel tungkol sa di pa rin mamatay-matay na paratang sa kanilang dalawa ng partner niyang si Mikee.

Kahit may nakahaing reklamo sa kanila sa Department of Justice (DOJ), wala pa rin daw kasong naiaakyat sa kanila sa korte.

Sabi ni Yexel (arranged for clarity), “To Family and Friends isama nadin natin un mga nakiki chismis at usyoso lang

“Mula umalis kami ng Pilipinas, Oct 9 2023, hanggang sa kasalukyan, January 31 2025

“Wala po kaming kaso, wala po kaming hold departure, wala po kaming warrant of arrest, at hindi po kami wanted.

“UP TO NOW, opo hanggang sa kasalukuyan, yan po ay pinalaki at pinalala ng maling programa, mapanghusgang at papogi na broadcast journalist, media personality, mga influencers at mga Nakisawsaw na mga vloggers at pages para pagkakitaan

“At kahit malaking mainstream media, totoo na hindi lahat ng nakikita at napapanood mo sa kahit ano o kahit sino ay pwede mo na agad paniwalaan.

“Hanggat wala ka don sa mismong pangyayari o ikaw mismo ang naka saksi o nakakita, wag kang maniniwala”

Ayon pa kay Yexel, hanggang ngayon ay hindi pa umuusad ang reklamong isinampa ng mga diumano’y biktima nila ng partner na si Mikee sa DOJ.

Ibig sabihin, nasa prosecutor’s level pa lamang ito.

“Sinampahan kami ng kaso at nasa DOJ parin hanggang sa ngayon, wala pang resolution o resulta, kung i aakyat ba ito bilang kaso o ibabasura ng korte”

Ang ikinadismaya raw ni Yexel ay parang nahatulan na silang scammer o manloloko.

Aniya, “Kumbaga nasa step 1 palang pero sa mata nang hindi lubusang nakaka intindi at makikitid ang pang unawa at hindi nakaka kilala sa amin ay nahatulan na kami bilang scammer o manloloko.

“Hindi pa umaakyat o hindi paman din kami nakakalaban sa korte nahatulan na, bakit?

“Kasi mas magaling pa tayong mga nagcocomment lang, nakikichismis lang.

“Kesa sa mga abugado at hurado. At sa tunay na inakusahan mas lumaki ang bibig natin kesa sa isip natin mas madali pagtawanan ang mga tao kesa tulungan maka ahon

“Yun may ari po ng Casino Junket (Hector Pantollana ay nadakip na sa Indonesia nun Nov 2024 at naka detain napo jan sa Pilipinas.

“Nasa news po yan last year. Yan po yun binanggit ko na pangalan na hindi pinaniwalaan ng karamihan

“Dahil mas madali maniwala sa chismis kesa maging matalino at magisip

“Meron din mga tao o kaibigan mong itinuring na imbis na i angat at ipaglaban ka, sinawsawan ang issue para ibida ang sarili at gawin kang katatawanan”

Nabanggit din ni Yexel ang pangalan nina Neri Naig, Ken Chan, at Ruffa Mae Quinto na kapareho raw niyang nais lamang kumita ng malaki pero nasangkot sa kontrobersiya.

Saad pa niya, “Nakulong si Neri Naig, may dalawang warrant of arrest si Ken Chan, si Ruffa Mae sinampahan din ng kaso

“Meron din singer na nireklamong scammer na palagay ko wala ding intensyon ang mga taong ito para manloko ng mga tao

“Ang gusto lang ay kumita ng malaki at makatulong din sa iba dahil sa oportunidad na nakita”

YEXE: “Ang tagal kong binuo ang pangalan ko Hindi para manloko”

Sa ikalawang bahagi ng post ni Yexel, sinabi nitong nasaktan siya sa nangyayari sa kanya dahil matagal daw niyang binuo ang pangalan niya.

Nasira raw ito dahil tinawag na siyang manloloko ng mga OFW.

Saad niya (arranged for clarity), “Ang tagal kong binuo ang pangalan ko hindi para manloko

“Dahil dati rin akong OFW at alam ko ang paghihirap sa bawat pisong kinikita

“Sadyang meron mga bagay sa mundo na hindi natin kayang macontrol kapag naglaro na ang tadhana.

“Yan ay maaaring tama ako sa paningin ko at tama din sila sa paningin nila pero iba ang ipinakita sa amin ng tadhana”

Pangako niya, gagawa daw siya ng paraan na yung mga taong nalugi ay kanyang matulungan.

Aniya, “Hindi ako humihinto gumawa ng paraan na balang araw babalikan ko lahat ng taong nalugi para tulungan sila.

“Hindi para bayaran dahil hindi ako ang nangutang sa kanila at maliwanag na alam nilang lahat yun

“Kundi “para tulungan” sila maka ahon sa paraan at diskarteng alam ko.”

Pero sa ngayon daw ay mabuting manahimik muna siya dahil sa daming nagsasalita laban sa kanya.

Kabilang na rito ang mga taong dati ay inituring niyang kaibigan pero ngayon ay sinisiraan siya.

“Pero sa ngayon mas mabuti tahimik nalang muna at Diyos nalang ang magpapasya kung ipagkakaloob ang lahat ng plano na gusto kong mangyari

“Naging mahirap sakin ito dahil sa napakaraming tao ang nagsasalita at nakikigulo, nagkakampihan at lahat ng sasabihin ko ay gagamitin laban sa akin

“Kaya minabuti ko nalang na tumahimik at panoorin kung ano ang mga susunod na mangyayari.

“Tinanggap lahat ang mga paratang, masasakit na salita laban sakin, na kahit tumatagos ito sa buto at kaluluwa hinayaan ko lang at mas inunawa na mas marami ang naapektuhan at nasirang buhay, kahit ganon din ang sitwasyon na sinapit namin”

Hindi raw nawawalan ng tiwala si Yexel sa Diyos kaya magpapatuloy ang kanyang buhay.

Aniya, “Ganon paman tuloy lang ang buhay na nagpapasalamat palagi sa Diyos

“Kahit mahirap ang sitwasyon wag kang hihinto manalangin at mas lalo ibigay ang buong tiwala na darating ang araw na liliwanag muli ang madilim na daanan na sa bawat patak ng luha ay tutumbasan Nya ng mas higit pang biyaya at kaayusan sa tamang panahon.

“mas maraming aral, karanasan at nakatagong biyaya ang mapupulot natin sa mapapait na pangyayari satin kaya lagi parin natin ibigay ang papuri sa pinaka makapangyarihan at pinakamataas sa lahat.

“Ipagpatuloy ang buhay na lagi parin nagpapasalamat sa lahat ng pinagdaanan at “nakamtan”

Ang huling lugar na namataan sina Yexel at Mikee ay sa bansang Japan.

Hindi pa malinaw sa ngayon kung nasa Japan pa rin sina Yexel at Mikee.