Pumanaw na ang ama ni Angel Locsin na si Angel Colmenares nitong Miyerkules, March 5, 2025.

Siya ay 98.

Kinumpirma ng pamilya ni Mr. Colmenares ang pagpanaw ng ama ng aktres sa ABS-CBN ngayong Huwebes, March 6.

Inanunsiyo rin ng talent manager at concert producer na si Mario Colmenares, pamangkin ng yumao, ang pagpanaw ng ama ni Angel Locsin sa pamamagitan ng isang artcard na ibinahagi nito sa Facebook ngayong araw.

Nakalagay sa artcard ang larawan ni Angel Colmenares.

Sa ibaba ng larawan ay nakasulat ito: “In loving memory of Angel M. Colmenares.”

Nakalagay rin dito ang petsa ng kapanganakan (February 17, 1927) at kamatayan (March 5, 2025) ng ama ng aktres.

Nakasaad din dito na nakalagak ang mga labi ni Angel Colmenares sa Heritage Park sa Taguig City.

Walang caption na inilagay si Mario.

Nakikiusap naman ang pamilya ng pumanaw na igalang ang kanilang privacy, kasabay ng kanilang pasasalamat sa mga nagpaabot ng kanilang pakikiramay at pagdadalamhati.

Hindi tinukoy ang sanhi ng pagkamatay ng ama ni Angel Locsin.

ANGEL COLMENARES AS ANGEL LOCSIN’S SWIMMING COACH

Si Angel Colmenares ay swimmer noong kanyang kabataan.

Bahagi siya ng Philippine team na nanalo ng bronze medal sa 4×200-meter freestyle relay sa 1954 Asian Games na ginanap sa Pilipinas.

Ipinasa ni Angel Colmenares ang kanyang kaalaman sa swimming sa anak na si Angel Lcsin.

Sa interview ni Mr. Colmenares sa defunct showbiz-oriented talk show ng ABS-CBN na The Buzz noong July 22, 2007, ibinahagi nito ang pagiging coach ng anak sa swimming.

Sinanay raw niya ang aktres sa paglangoy hanggang sa maging national champion ito sa edad na 11.

Nakipag-compete rin daw si Angel Locsin sa Hong Kong international age-group meet kung saan nanalo ito ng dalawang silver at isang bronze medals.

“I feel very happy talagang I never thought she would achieve these things, she would have a life like this.

“She is very popular and one thing good is that marunong siyang makisama and she’s generous. Everybody loves her,” sabi ni Mr. Colmenares sa panayam sa kanya ni Boy Abunda na ginanap sa mismong tahanan ng ama ng aktres sa Commonwealth Avenue, Quezon City.

Palagi rin daw pinapaalalahanan ni Mr. Colmenares si Angel na i-improve ang sarili at ma-involve sa ibang activities, gaya ng pagnenegosyo, dahil wala raw permanente sa showbiz.

Isa raw sa mabisang paraan para ma-improve ang sarili ay sa pamamagitan ng pag-aaral.

Saad ni Mr. Colmenares: “Hindi naman pinakaimportante sa lahat ng bagay ay pera, e.

“In fact, even with just enough money, you could be very happy. You have less problems, you’re healthy.

“So she’s also concerned with her health, that’s why she also wants sufficient time and space for her to be able to live more normally.”

ANGEL COLMENARES’S BLINDNESS

Hindi lingid sa kaalaman ng publiko na noong nbubuhay pa ang ama ni Angel Locsin ay matagal na itong hindi nakakakita.

Sa panayam ni Mr. Colmenares sa The Buzz noong 2007, ikinuwento nitong tuwang-tuwa siya nang ibalita ng anak na meron nang development sa eye surgery na puwede nilang subukan para makakita ulit ang ama ng aktres.

Ipina-schedule daw agad ni Angel sa St. Luke’s Hospital ang ama upang patingnan ang mga mata nito.

Sa kasamaang-palad, hindi pa angkop sa defect ng mata ni Mr. Colmenares ang bagong technology.

“She cried, she cried,” kuwento ng ama ng aktres.

“Sabi niya, ‘Sana Daddy, makakita ka [crying] para makita mo ako sa television o sa movie.’

“I told her, ‘Ah, never mind, don’t cry. I’m happy as I am. Especially you are there, you’re progressing very well in your career.’”

ANGEL COLMENARES ON ANGEL LOCSIN’S EX-BOYFRIENDS

Bago nagpahinga sa showbiz at social media si Angel Locsin, sa isang bihirang pagkakataon ay muling nasilayan ng publiko na kasama ng aktres ang kanyang ama.

Ito ay nang itampok ni Angel si Mr. Colmenares sa YouTube channel ng aktres at ng mister na si Neil Arce noong March 5, 2022.

Dito ay inusisa ni Angel si Mr. Colmenares, na kaka-celebrate lang noon ng kanyang 95th birthday, kung mayroon siyang ex-boyfriend na hindi nagustuhan ng ama.

“Sino sa mga naging ex ko ang pinakaayaw mo?” tanong ni Angel sa ama.

Sabay turo ng aktres sa hawak niyang cue card, “Nandidito, ha! Nakalagay. Ayoko ito tanungin ha!”

Natawang hirit ng ama ni Angel, “Huwag kang magalit.”

Pero hindi ito sinagot ni Mr. Colmenares.

Katwiran niya, “Nakalimutan ko pangalan.”

Ang mga ex-boyfriend ni Angel na mula sa showbiz ay sina Luis Manzano, Phil Younghusband, Oyo Sotto, at yumaong aktor na si Miko Sotto.

ANGEL COLMENARES ON GIVING HIS BLESSING TO ANGEL-NEIL

Inalam din ni Angel Locsin ang reaksiyon ng ama nang magpaalam si Neil bago ito nag-propose sa aktres noong 2019.

Ang alam lang daw ni Angel ay bersiyon ni Neil na “a week before Father’s Day” ay kinausap nito ang ama ng aktres.

Sa kuwento noon ni Neil, akala ni Mr. Colmenares ay “business proposal” ang pag-uusapan nila.

Ang kapatid ng aktres na si Ella ang nagbigay-linaw na marriage proposal ang pakay ni Neil.

“Happy” naman daw si Mr. Colmenares na natagpuan ng anak ang taong nakalaan para rito.

“First of all, I want you to be in good hands and nasa age ka na,” sabi ni Mr. Colmenares kay Angel.

Tanong ulit ng aktres, “Anong lesson tungkol sa pag-ibig ang puwede mong ibigay sa akin?”

Sagot ni Mr. Colmenares, “Kailangan talaga to be happy in a married life, take good care of each other every day and put Christ in the center of your life.”

Iyon ang huling pagkakataong nasilayan ng publiko ang ama ni Angel Locsin.

Sa pagpanaw ng kanyang ama, marami ang umaasang muling makikita ng publiko si Angel Locsin mula nang magdesisyon itong mag-focus sa kanyang private life.