Pinatawad na ni Coco Martin si Katherine Luna dahil sa pagtuturo sa kanya nito noon na siya umanong ama ng ipinagbubuntis ng aktres.

Taong 2005 nang magkatrabaho sina Coco at Katherine sa pelikulang Masahista.

Makalipas ang ilang taon, may nangyari sa kanila.

Nang mabuntis si Katherine ay isinapubliko niyang si Coco ang tatay ng bata.

Fast-forward to 2025, inamin ni Katherine na maling itinuro niya si Coco gayong kalaunan ay nalaman ng aktres na ibang lalaki ang ama ng kanyang anak.

Sinabi iyon ni Katherine sa panayam sa kanya ni Julius Babao noong Pebrero 2025.

Sa The Buzz interview kay Coco noong 2014, una nang nilinaw ni Coco na ipina-DNA test niya ang anak ni Katherine nang makita niya ang bata habang ginagawa ng aktor ang pelikulang Born To Love You (2012).

Noon niya napatunayang hindi siya ang ama ng bata.

Ibinahagi rin noon ni Coco na nang nabuntis si Katherine ay hindi niya ito nilayuan.

Tinanong din daw niya kung ano ang kanyang maitutulong kahit nasa kolehiyo pa siya noon at paraket-raket lang sa indie films.

Hanggang nakita niya ang bata nang dalhin ito ni Katherine sa location shoot ng Born To Love You sa Luneta.

COCO MARTIN ON KATHERINE LUNA

Nakapanayam ng PEP.ph (Philippine Entertainment Portal) si Coco sa 38th Star Awards For Television sa Dolphy Theater, sa ABS-CBN compound, noong Linggo, March 23, 2025.

Dito ay hiningan namin ng reaksiyon si Coco sa paghingi ng tawad ni Katherine sa atraso nito sa kanya.

“Limot ko na yun, kung anuman yun, napatawad ko na siya,” pahayag ni Coco.

Sa muling paglitaw ni Katherine, bali-balitang ipapasok siya ni Coco sa cast ng FPJ’s Batang Quiapo, ang ongoing Kapamilya primetime series na pinagbibidahan ni Coco.

Saad niya: “Actually, inaayos ko pa kasi sabi niya hindi pa siya ready, parang may pinagdadaanan siya ngayon.

“Pero ginagawa ko ang lahat para masuportahan siya kasi, looking foward, gusto ko talaga siyang makatrabaho dahil napakahusay niyang artista at kailangan siya ng industriya natin.

“Sana, hinihiling ko na makabalik siya at nandito ako para suportahan siya.”

Sinabi rin ni Coco na handa siyang tumulong kay Katherine.

“Basta kung ano ang kinakailangan niya, kung ano ang maitutulong ko para makabalik siya dito.

“Bago ang lahat, naging magkaibigan kami, e, kaya kung ano ang magagawa ko.”

COCO MARTIN WINS AT 38TH STAR AWARDS FOR TV

Itinanghal ang FPJ’s Batang Quiapo bilang Best Primetime Series sa 38th Star Awards for TV.

Labis ang pasasalamat ni Coco sa parangal ng Philippine Movie Press Club (PMPC) na bumubuo ng award-giving body.

“Kahit gaano pa katagal, hihintayin namin ito, kasi sobrang pinaghirapan yung show.

“At inaalay ko ito sa lahat ng aking mga katrabaho, sa ABS-CBN, sa TV5, sa GMA, at sa lahat ng Pilipino na hanggang ngayon ay nagmamahal at sumusuporta sa amin.”

Dagdag ni Coco: “Sabi ko nga, every time na na-appreciate yung programang ginagawa namin, mas lalo naming pinagbubutihan talaga.

“Like sa Probinsyano, inabot siya ng seven years, at ngayon ang Batang Quiapo magti-three years na, kaya sobra kaming nagpapasalamat talaga sa lahat ng mga taong sumusuporta at nagmamahal sa show.”

Bukod sa pagiging lead star, si Coco ay creative director din ng Batang Quiapo. Siya ang nagko-call ng shots pagdating sa takbo ng istorya at cast.

May mga artistang hindi aktibo sa showbiz ang pinapasok ni Coco sa cast, at nabibigyan ng pagkakataong mapansin ulit ng madla.

Sabi niya tungkol dito: “Siguro para sa akin, yun naman talaga ang purpose ng show, hindi lang para makapagbigay ng ligaya at inspirasyon sa mga manonood, kundi sa ating industriya na mabigyan ng trabaho ang mga tao na nangangailangan ng tulong.

“Masaya ako dahil sa pamamagitan ng show na ito, marami tayong natutulungan at nabibigyan ng pag-asa.

“Maraming mga tao ang gustong sumubok sa ganitong trabaho, nabibigyan din natin ng oportunidad na makapasok din sila.”

Marami pa raw aabangan sa serye.

“Sabi ko nga, kung napanood ninyo ang simula ng Batang Quiapo nung pilot, ngayon pagpasok ng maraming mga artista, parang nagsisimula pa lang uli kami, parang pilot pa rin ang ginagawa namin,” sabi ni Coco.

COCO MARTIN ON OLD ABS-CBN BUILDING

Inspirado si Coco sa trabaho, pero aminadong may lungkot siyang nararamdaman dahil sa nalalapit na paggiba sa old building ng ABS-CBN.

Kasama sa area ng ABS-CBN compound na nabili ng Ayala Land ang Millennium Transmitter Tower, Chapel of the Annunciation, ilang mga network studio, at ang Dolphy Theater.

Ani Coco: “Napaka-sentimental kasi napakaraming magagandang experience at napakaraming natutunan dito sa Dolphy Theater.

“Di ko ma-explain ang pakiramdam, pero sabi ko nga, at least nakapunta kami dito, nakapagpasalamat sa inyo sa karangalang ito.

“Part ang ABS-CBN ar Dolphy Theater sa karangalang ito.”

COCO MARTIN ON JULIA MONTES

Sa huli, inalay rin ni Coco ang Star Awards award ng Batang Quiapo sa kanyang partner na si Julia Montes.

Sabi ni Coco sa PEP, maganda ang takbo ng relasyon nila ni Julia.

“Masaya siyempre, kasi bilang mag-partner, talagang nagsusuportahan kami, talagang nagtutulungan kami sa bawat hakbang na ginagalawan namin.

“Kaya para sa kanya ito, inaalay ko sa kanya ito,” pakli ng aktor.