Unti-unti nang nakakabangon mula sa kinaharap niyang kontrobersiya ang Kapamilya actress-singer na si Maris Racal.

Ito’y matapos niyang masangkot sa isa sa pinakamalaking isyu noong 2024, dulot ng cheating allegation ng ex-girlfriend ng ka-loveteam niyang si Anthony Jennings na si Jam Villanueva.

Makaraan ang ilang linggo mula nang pumutok ang isyu noong December 2024, muling nagkrus ang landas nina Maris at Anthony para sa promo ng kinabibilangan nilang ABS-CBN action series na Incognito.

Kasama nila sa teleserye sina Daniel Padilla, Richard Gutierrez, Ian Veneracion, Baron Geisler, at Kaila Estrada.

MARIS RACAL ON WORKING ANEW WITH ANTHONY JENNINGS

Sa eksklusibong panayam ni Maris kay MJ Felipe ng ABS-CBN News nitong Miyerkules, February 12, 2025, naitanong sa aktres kung kumusta na sila ni Anthony, lalo na sa set ng Incognito.

Ayon kay Maris, sa kabila ng kontrobersiyang pinagdaanan nila ay nananatili silang professional ni Anthony.

Sinisiguro rin daw nilang sa bawat eksena ay ibinibigay nila ang lahat ng kanilang makakaya at isinasantabi ang personal nilang pinagdaraanan.

Ani Maris: “Right now sa set, we’ve been, like, really supportive of each other when it comes to the scenes.

“Like, we see to it that we make the scenes as natural as possible.

“Still, like the scenes that we used to do in Can’t Buy Me Love, like, we still have that energy on set.

“Focus kami sa work ngayon. [We’re] professional.”

Sundot na tanong ni MJ, “Wala namang galit? Ano yon, how did you manage that?”

Nakangiting sagot ni Maris, “Wala. Like I said, inner work.

“It’s really best to be in tune with your soul, your spirituality, so that it reflects on the outside.”

Hindi rin nakaligtas si Maris sa tanong kung hanggang ngayon ay magkaibigan pa rin ba sila ni Anthony.

Tipid niyang sagot, “We’re good.”

MARIS ON coping strategies AFTER THE CONTROVERSY

Aminado si Maris na isa sa pinakamalaking dagok na nangyari sa kanya ang isyung kinasangkutan niya noong 2024, kunsaan pinaratangan siyang third party sa relasyon ni Anthony at ex-girlfriend nitong si Jam Villanueva.

Bukod sa kanyang showbiz image at career, labis din daw na naapektuhan ang mental health ng aktres.

Bunsod nito, minabuti raw niyang mag-focus sa ispiritwal na aspeto ng kanyang buhay para muli siyang makapagpatuloy sa hinaharap.

Saad ni Maris: “Right now, I am more focused in the spiritual aspect of my life.

“I feel like I am more in tuned with God now and universe. Just be present wherever I am. Like, right now, I’m here being with you, a hundred percent.

“It’s also about a lot of inner work for me to do.”

Pagbabahagi pa ni Maris, malaking tulong din ang kanyang pagsu-soul searching noong kasagsagan ng isyu para makalimot.

Aniya, “Nagbundok ako. I wrote songs. I did a lot of things that could help me with my mental health.”

MARIS-ANTHONY CHEATING CONTROVERSY

Noong December 3, sumambulat sa social media ang nakakabulabog na Instagram posts ng ex-girlfriend ni Anthony na si Jam Villanueva.

Si Maris ang itinuturong dahilan kung bakit nagwakas ang halos pitong taong relasyon nina Anthony at Jamela.

Pinararatangan din sina Maris at Anthony ng cheating o panloloko habang may kanya-kanya pa silang karelasyon.

Pagkalipas ng tatlong araw, noong December 6, naglabas ng video ang ABS-CBN ng magkasunod na public apology nina Maris at Anthony.

Dito ay inako ng dalawa ang kanilang pagkakamali at humingi ng tawad sa mga taong nadamay at nasaktan.