Pagkatapos ng napakaraming taon, humingi ng tawad si Katherine Luna kay Coco Martin.

Nitong February 17, 2025, tampok si Katherine sa exclusive interview ni Julius Babao para sa YouTube channel ng TV5 broadcaster.

Dito binasag ni Katherine ang matagal niyang pananahimik ukol sa diumano’y anak nila ni Coco.

KATHERINE LUNA ON MUTUAL UNDERSTANDING WITH COCO MARTIN

Inusisa muna ni Julius si Katherine kung paano sila nagkaroon ng relasyon ni Coco.

Paglilinaw ni Katherine, hindi iyon relasyon kundi “mutual understanding.” Nagkatrabaho raw sila noon sa isang indie movie.

Lahad niya: “Mabait kasi si Coco. Siyempre, ako naman, ‘Pogi!’ Mahilig ako sa pogi dati.

“Gusto ko siyang kasama. Nararamdaman mo meron nang mutual understanding.”

Nakikitulog pa raw noon si Coco sa tirahan ni Katherine.

Kalaunan ay bigla raw tumamlay ang kanilang pagkakaibigan. Naging madalang ang kanilang pagkikita.

Pagkatapos ay may nakilala raw na isang Chinese businessman si Katherine, at may nangyari sa kanila.

Nasundan daw ito ng muling pagkikita nila ni Coco, na noon ay hindi pa gaanong sikat.

Makalipas ang tatlong buwan, nadiskubre ni Katherine na buntis na siya.

WHO’S THE FATHER OF KATHERINE’S CHILD?

Hindi raw sigurado si Katherine kung sino ang ama ng batang nasa kanyang sinapupunan.

Ipinaalam daw ni Katherine kay Coco na baka ito ang ama ng kanyang dinadala.

Pinuri ni Katherine si Coco na hindi raw lumayo sa kanya matapos niya itong sabihan, kahit may karelasyon nang iba noon ang aktor.

Nang magsilang si Katherine ng sanggol na babae, dumalaw pa raw si Coco at binuhat ang anak ng aktres.

Sinabi raw ni Coco na kamukha niya ang sanggol noong bata pa siya.

Inakala raw ni Katherine na ang ibig sabihin ni Coco ay inaako nito ang pagiging ama ng anak ng aktres.

“Ako naman, asyumera ng taon. Assume ako,” sabi ni Katherine.

Pero iginiit ni Katherine na pagkapanganak niya sa anak ay hindi siya humingi ng kahit na anong suporta mula kay Coco.

Pero habang lumalaki raw ang bata, doon napansin ni Katherine na mas nagiging kamukha nito ang Chinese businessman na nakasama niya ng isang gabi.

Dito na raw nabuo sa isip ni Katherine na hindi si Coco ang ama ng kanyang anak kundi ang businessman.

Pero hindi niya iyon inamin sa publiko.

Ani Katherine, “Hindi siya ang ama. Ang hirap na lang bawiin. Unang-una, merong bata, e.”

Noong mga nasa three years old na ang anak ni Katherine, may mga pagkakataong hinihiram daw ni Coco ang bata.

Wala raw kamalay-malay si Katherine na nagkikita si Coco at ang kanyang anak.

Nakikipag-usap din daw si Coco sa ina ni Katherine nang hindi niya alam

Hinala ni Katherine, ito marahil ang naging pagkakataon ni Coco para mapa-DNA ang bata.

COCO IS NOT THE FATHER BASED ON DNA

Ang isyung ito ay in-address ni Coco sa interview sa kanya ni Boy Abunda sa The Buzz, ang defunct showbiz talk show ng ABS-CBN, noong 2014.

Sa interview na iyon, naglabas ng hinanakit si Coco dahil sa panghuhusga raw sa kanyang nakabuntis siya at hindi raw niya pinapanindigan.

Iyon daw ang mga panahong nagsasalita si Katherine sa interviews at pinaparatangan si Coco.

Sinegundahan din ng aktor ang sinabi ni Katherine nang sabihin ng aktres na buntis siya, ang tanong ni Coco ay ano ang suportang kailangan niyang ibigay.

Sinabi rin ni Coco na nahiram nga niya ang bata at kinuha ang pagkakataon na iyon para mapa-DNA ito.

Sabi ni Coco sa The Buzz interview: “Ayun, kinausap namin ang lola tapos pumayag siya na ipa-DNA.

“Ang result, negative. Hindi ko anak ang bata.

“On my part, gusto kong akuin ang bata. Siyempre, wala siyang kasalanan.

“Hindi ko rin alam kung ano ang puwedeng puntahan. Paano na ngayon, yung pinakainaasahan niyang hope, wala pala.”

KATHERINE ADMITS HER FAULT

Ayon kay Katherine, tumatanggi siya noon sa mga nais mag-interview ukol sa isyu.

Rason niya, “Hindi ko nga alam kung paano ko sasabihin sa kanya [Coco] kasi nga pinangungunahan ako ng hiya, e.”

Gusto pa nga raw makasama ni Coco ang bata, pero tumanggi na si Katherine dahil alam na niyang hindi ito anak ng aktor.

Isinaalang-alang din daw ni Katherine ang kapakanan ng musmos pa niyang anak noon tungkol sa tunay na ama nito.

Binanggit ni Julius Babao sa interview niya kay Katherine na ang pagkakamali ng aktres ay hindi niya inamin kay Coco na hindi ito ang ama ng bata.

Paliwanag ni Katherine: “Di ko alam kung paano ko babawiin. Di ko alam kung paano ko ipapaliwanag yung sarili ko.

“Kasi ito na yung nasabi ko, e.”

Ayon pa kay Katherine, bago pa man mangyari ang DNA testing ay nananahimik na raw siya.

Pag-amin niya: “Pinili kong magtago sa tao. Mas pinili kong wag sagutin yung isyu. Mas pinili ko na nga lang na mawala sa eksena kasi nahihiya ako.

“Kasi hindi ko alam kung anong mukha ang ihaharap ko. Hindi ko alam kung paano sasabihin na mali ako, na nagkamali ako.”

Bukod sa hamon na iyon, inisip daw ni Katherine kung ano ang magiging epekto nito sa kanyang anak.

“Nagkaroon ng mga kasalanan, nagkaroon ako ng mga pagkakamali, pero hindi ko intensiyon na guluhin ang buhay niya noon para sa anak ko,” sabi ng aktres ukol kay Coco.

“Bata pa ako [noon], madali akong maniwala sa sabi-sabi, yun ang pinaniwalaan ko.”

Ibinahagi rin ni Katherine na na-contact niya ang businessman na totoong ama ng kanyang anak, at sinabi niya ritong nagkaanak sila.

Hindi na raw sumagot ang businessman, na isa rng aktres daw ang asawa ngayon.

KATHERINE APOLOGIZES TO COCO

Masaya raw ngayon si Katherine para sa tagumpay na inaasam ni Coco.

Saad niya: “Sa kabila ng mga nangyari saka sa mga isyu sa amin, masaya ako para sa kanya.

“Deserve niya yon dahil nung nasa pa-indie-indie pa lang siya, pinush niya yun.

“Pinursige niya yon para makarating sa tuktok. Yun yung taong pursigido talaga sa buhay, determinado.”

Tinanong si Katherine kung may mensahe siya kay Coco.

Sagot niya: “Sobrang hiyang-hiya ako kung ano man yung nangyari… yung mga nasabi ko dati.

“Sana balang-araw mapatawad mo ako.

“Gusto kong magpasalamat kasi hindi katulad ng iba diyan, pag sinabing sa kanya [ang bata], walang pakialam.”

Pero nang sinabihan daw niya si Coco na buntis siya, hindi lumayo ang aktor, bagkus ay nag-effort ito para maging responsable.

“Pero yung nga, sorry, nagkamali ako dala ng kabataan, dala ng maling nagawa ko noon.

“At ikaw, nagulo ang buhay mo. Humihingi ako ng dispensa.

“Sana mapatawad mo ako balang araw,” sabi ni Katherine.

KATHERINE REVEALS WHAT SHE WENT THROUGH

Si Katherine ay nakilala dahil sa kanyang maiden indie movie sa Babae Sa Breakwater (2003) na idinirek ng yumaong si Mario O’Hara.

Nanalo ng tatlong best actress awards si Katherine sa bansa at dalawa sa abroad dahil sa pagganap niya pelikulang ito.

Nakagawa rin siya ng ilan pang mga pelikula at lumabas sa telebisyon.

Sa panayam ni Julius, inilahad ni Katherine ang naging mabigat na pasanin niya sa buhay nang talikuran ang showbiz.

Sabi ng former indie actress, iniwan niya ang showbiz dahil nawalan siya ng kumpiyansa sa sarili.

Noong 2015, kapapanganak pa lamang daw niya sa ika-anim na anak nang hiniram ito ng dating kinakasama niya.

Nagkakaproblema na raw ang kanilang relasyon noon. Tumanggi raw ang lalaki na ibalik ang sanggol.

Dinibdib daw ito nang husto ni Katherine at walang tigil sa pag-iyak. Naapektuhan daw nito ang isa niyang mata.

Sa buong interview ni Julius, tinatakpan ni Katherine ng kanyang buhok ang kalahati ng kanyang mukha.

“Nagkasakit po ako. Nagkaproblema yung kabilang mata ko. Siyempre, nawalan ako ng tiwala sa sarli ko. Nahiya ako,” paliwanag ni Katherine.

Ang sumunod daw na nangyari, “Nalinya na ako sa bisyo.”

Pag-amin niya: “Parang yun na lang kakapitan mo, dun ka na lang kumukuha ng lakas ng loob, kapal ng mukha para humarap sa mga tao.

“Una, patikim-tikim. Hanggang sa wala, naligaw ka na.”

FOUR YEARS IN PRISON

Isa pa raw sa mga pinagdadaanan noon ni Katherine ay ang sama ng loob sa kanyang ina.

“May nagawa kasi siya sa akin sa pamilya na medyo bumagsak talaga ako, na para kang.. doon ako nalunod na di ako makaahon.”

Kalaunan ay inamin niyang may kinalaman ito sa maling investment at naglaho ang lahat ng kanyang pinaghirapan.

Naubos daw lahat ng kanyang ipon.

Dinibdib daw iyon ni Katherine dahil todo-kayod siya sa pagtatrabaho bilang breadwinner.

Taong 2020 naman daw nang salakayin ng mga awtoridad ang kanilang bahay at pinosasan siya at ang kanyang kinakasama noon.

Sinabi ni Katherine na gumagamit siya, pero hindi siya nagbebenta ng drugs.

Nakulong daw siya ng apat na taon.

Tinanong siya kung ano ang karanasan niya sa loob ng kulungan.

Pagbabalik-tanaw niya: “Malungkot pero nakaka-survive kasi may mga activities po nila [na] sumasali ako.

“Ako sa kitchen. Nagluluto po ako para sa mga personnel, sa mga preso.

“Pinagkatiwalaan po ako doon. Di ganun kahirap pero malungkot.”

Habang nasa piitan, minsang dumalaw ang kanyang ina ay nagkaroon daw sila ng heart-to-heart talk.

Dito raw ibinuhos ni Katherine ang lahat ng sama ng loob niya sa ina.

Humingi ng tawad sa kanya ang ina. Nagkapatawaran sila.

Doon nagsimula ang pagbabago ni Katherine. Natuto raw siyang magdasal na hindi niya dating ginagawa.

Sa loob ng kulungan, na-realize niya ang kanyang mga pagkakamali at mga pagkukulang sa mga anak.

Nagkaroon daw ito ng magandang epekto sa kanya para sa pagbabago at pagkapit niya sa pananampalataya.

Nagkaroon daw ng “milagro” dahil biglang bumilis ang usad ng kaso laban sa kanya. At na-dismiss ito.

Napahagulgol daw si Katherine dahil makakalaya na siya.

KATHERINE ON BIGGEST REGRET

Sa kabila ng kanyang pagkakakulong, naniniwala si Katherine na may rason kung bakit iyon nangyari.

Kung hindi raw siya nakulong, marahil daw ay patay na siya ngayon o kaya ay parte na ng malaking sindikato.

May kinalaman sa kanyang pitong anak ang sagot ni Katherine nang usisain siya ukol sa pinakamalaking pagsisisi niya.

Ani Katherine, “Napabayaan ko ang mga anak ko. Naipaalaga ko sila sa ibang tao.”

Sa ngayon ay bumabawi raw si Katherine sa kanyang pitong anak.

“Yung pagiging ama’t ina, pinipilit ko naman kahit mahirap kasi… pinipilit mag-provide, tsaka pinipilit kong ipakita sa kanila—na iparamdam sa kanilang may nanay sila. Na nandito ako.”

Nagtatrabaho raw ngayon si Katherine sa pagpe-perform sa mga shows tulad ng pole dancing.