May espesyal na ugnayan ba ang Kapuso stars na sina Mavy Legaspi at Ashley Ortega?

Ito ang tanong ng maraming netizens matapos mag-viral online ang videos ng dalawa na magka-holding hands habang papasok sa isang establisimyento sa Cebu City.

Magkasama sina Mavy at Ashley sa Cebu nang dumalo at makisaya sila sa taunang Sinulog Festival noong January 19, 2025.

Sa kuhang video ng isang netizen, naaktuhan niya ang dalawa na magka-holding hands while walking papasok sa isang restaurant.

Nakasuot si Mavy ng itim na T-shirt at kulay gray na short, habang si Ashley naman ay naka-puting cropped tank top at maong na pantalon.

Kalakip nito ang caption ng nasabing uploader na (published as is), “Mavy and ashley spotted.”

MAVY’S INSTAGRAM POST

Mas lalo pang naghinala ang netizens na may espesyal na namamagitan kina Mavy at Ashley nang i-upload ng aktor sa kanyang Instagram nitong Lunes, January 20, ang mga kuhang litrato sa dinaluhan niyang Sinulog Festival.

Kasama na rito ang litrato nila ni Ashley kung saan nakatakip sa kanilang mukha ang puting tela.

Bukod pa rito ang sweet photo nilang nakayapos si Ashley sa balikat ni Mavy sa group photo kasama ang ilang mga kaibigan.

Tanging caption ni Mavy sa kanyang post (published as is), “pit senyor! daghang salamat cebu/cebuanos! had a great sinulog festival with you guys!”

NETIZENS’ REACTION

Sa comments section ng post ni Mavy ay bumuhos ang pagsuporta ng mga tagahanga nila ni Ashley.

Ito ay kahit hindi pa malinaw kung magnobyo at magnobya na ba sina Mavy at Ashley.

Giit kasi ng kanilang fans, parehas naman single ang dalawa matapos mahiwalay sa kani-kanilang mga karelasyon.

Si Mavy sa ex-girlfriend niyang si Kyline Alcantara.

Habang si Ashley naman ay matagal na ring hiwalay sa ex-boyfriend niyang politician, si Mayor Mark Alcala ng Lucena City, Quezon.

Komento ng isang netizen (published as is), “Bagay sila!! Maganda si Ashley ahhh ganda ng face nya.”

Request pa ng isa (published as is), “Super bagay kayo ni Ashley sana magkasama kayo sa Teleserye yun Romantic Comedy Ang Story.”

Mensahe pa ng isa (published as is), “We love you both @ashleyortega and @mavylegaspi hardlaunch na!”

“Sabi ko na nga ba at may gusto si Mavy kay Ashley, I watched the Sarap Di Ba nina Ashley and Lianne, yung may paghawak si Mavy kay Ashley, sabi ko balang araw mag jowa ang dalawang eto. Nangyari nga,” dagdag pa ng isa.

Samantala, habang isinusulat ang artikulong ito ay wala pang inilalabas na reaksiyon o pahayag sina Mavy at Ashley na magkukumpirma kung sila nga ba ay magkarelasyon na.