May sagot at paliwanag si former Senator Tito Sotto tungkol sa pahayag ng kampo ni Darryl Yap na ipinadala kay Vic Sotto ang script ng The Rapists of Pepsi Paloma bago inilabas ang kontrobersiyal na teaser ng pelikula tungkol sa buhay ng dating sexy star na si Pepsi Paloma.

Pero, diumano, walang feedback na natanggap ang direktor.

Ipinarating ni Tito sa publiko ang kanyang reaksiyon sa pamamagitan ng X (dating Twitter).

“Not true. False. They gave a script to Vic del Rosario not Vic Sotto. Vic nor I never read their script,” paglilinaw ni Tito.

May paalala rin si Tito sa pamunuan ng pahayagan na naglabas ng panig ng kampo ni Yap.

Aniya, “You should find out first if what you are reporting is accurate or not. Nakakahiya kumagat sa showbiz gimmick, mainstream pa naman kayo.”

Dagdag pa ni Tito, “Vic del Rosario turned it down.

“Sa mga gumagastos ng malaki para manira ng kapwa, ayos! Para mabawasan ang yaman ninyo!”

Ilang araw bago niya inilabas ang mga paglilinaw, nag-post si Tito sa kanyang X account ng pasaring na ito:

“When you rely on an old gimmick to make money and got your facts all wrong, you will falter, for sure!”

WHO IS THE PRODUCER OF PEPSI PALOMA MOVIE?

Ang Viva Films producer na si Boss Vic del Rosario at hindi si Vic Sotto ang “Vic” na tinutukoy ng dating senador.

Hindi ang Viva Films ang producer ng The Rapists of Pepsi Paloma.

Ayon sa mga lumilitaw na impormasyon, mismong si Yap ang nagpondo para magawa nito ang pelikula tungkol sa kuwento ng buhay ni Pepsi na kababayan niya sa Olongapo City, Zambales.

Pero hindi pa siya isinisilang nang magpatiwakal ang aktres noong Mayo 31, 1985.

Ang ina ni Pepsi na si Lydia at ang kapatid ng aktres na si Zaldy ang mga nakausap o resource person ni Yap tungkol sa pelikulang natapos ang shooting noong Disyembre 29, 2024.

DARRYL YAP REACTS TO TITO SOTTO’S POSTS

Sa pinakahuling Facebook post ni Yap, na tila sagot niya sa social media post ni Tito, may mga paglilinaw siya tungkol sa 19 counts ng reklamong cyber libel na isinampa ni Vic laban sa kanya.

Una, sabi ng kontrobersiyal na direktor, “Nagkakamali ang Divina Law (ang abogado ng kabila) na may order na ang husgado na i-takedown ang aking promo materials para sa The Rapists of Pepsi Paloma. Wala pong takedown order.

Pangalawa, “Ang hearing ay moved na sa Jan. 17. Hintayin ng husgado ang kanilang sagot sa aking Motion for Consolidation.”

Pangatlo, “Meron na pong GAG ORDER sa lahat, di na kami pwede magpahayag tungkol sa merito ng kaso, para di magkaroon ng kaguluhan sa pag-iisip ng tao. Ito na po ang huling pagkakataon na magsasalita ako patungkol sa kaso at naway malinaw po ito sa lahat ng sumusubaybay.”