Pinusuan ng mahigit sa isang milyon at inaasahang tataas pa ang bilang ng mga natuwa at tanggap na tanggap ang birthday photo shoot ni Kathryn Bernardo.

Ibinahagi ito ng Kapamilya star sa kanyang Instagram page para sa pagdiriwang ng ika-29 kaarawan niya noong Miyerkules, Marso 26, 2025.

Ginulat ni Kathryn ang publiko at ang mga tagahanga niya dahil seksing-seksi siya sa kanyang suot na itim na skimpy black bikini.

Ito ang unang pagkakataong nakita ang aktres sa ganoong klase ng kasuotan.

Ang mga kapwa-artista ni Kathryn ang ilan sa mga pumuri sa mapangahas na birthday pictorial na inilabas niya, ilang araw matapos ang kanyang pinag-usapang pagrampa sa Body of Work: The Bench Show na naganap noong Marso 21 sa Mall of Asia Arena, Pasay City.

IS KATHRYN READY FOR MORE DARING PROJECTS?

“What a great version of the birthday suit, “stunning,” at “sobrang happy birthday naman” ang ilan sa mga papuring natanggap ni Kathryn dahil sa kanyang “naglalagablab” na sexy pictorial.

Tila hudyat itong handa na siyang tumanggap ng mga matatapang at mapangahas na karakter sa pelikula.

Kung may mga natuwa at pumuri kay Kathryn, naging dahilan din ng balitaktakan ng kanyang mga tagahanga ang mapupusok na larawan niya.

May mga nagkomentong walang dahilan para magpaseksi si Kathryn sa mga photo shoot dahil mas gusto nilang manatili ang “wholesome image” ng aktres, pero higit na nangibabaw ang pagtatanggol sa kanya ng karamihan.

Para sa mga tagapagtanggol ni Kathryn, “classy pictorial” ang kanyang ginawa.

Nasa wastong edad na siya para magdesisyon sa kung paano niya gustong maging makasaysayan at hindi malilimutan ang pagdiriwang ng kanyang ika-29 kaarawan.