Liza Soberano at Tita Joni Lyn Castillo, May Matinding Gusot? Ogie Diaz, Nagbigay ng Opinyon!

Matindi umano ang naging alitan sa pagitan ni Liza Soberano at ng dati niyang road manager na si Joni Lyn Castillo, na siyang naging katuwang niya sa kanyang showbiz career noong nasa pangangalaga pa siya ni Ogie Diaz. Sa isang episode ng kanyang showbiz vlog, isiniwalat ni Ogie Diaz na hanggang ngayon ay hindi pa rin nagkakausap sina Liza at ang kanyang tita mula nang lumipat ng talent agency ang aktres.

Pinabulaanan din umano ni Tita Joni ang kumakalat na balita na siya ang muling mamamahala sa career ni Liza. Ayon kay Ogie, hindi na raw nagkakausap ang mag-tita at kung may mga negosyo man silang pinagtutulungan, isang representative na lang ng aktres ang kanyang nakakausap.

Bukod dito, ibinahagi rin ni Ogie Diaz ang isang social media post ni Tita Joni na sa kanyang palagay ay may kaugnayan kay Liza Soberano. Ang mensahe nito ay tila may bahid ng sama ng loob:

“You remembered everything. Sana natatandaan mo rin na sinabi ko sayo, pagdating ng panahon na makarating ka sa taas huwag na huwag mo akong babanggain dahil ako rin ang magpapabagsak sayo.”

Bagama’t hindi tuwirang tinukoy kung sino ang pinatutungkulan sa post, marami ang naghihinalang ito ay may kinalaman sa aktres. Gayunpaman, nilinaw ni Ogie Diaz na hindi niya gustong pangunahan si Tita Joni sa kung ano man ang tunay nitong nararamdaman.

Hiniling din ng showbiz insider na sana ay magkausap na ang mag-tita at bigyan ni Liza ng pagkakataon ang kanyang tita na maipahayag ang kanyang saloobin. Ayon kay Ogie, malaki ang naging kontribusyon ni Tita Joni sa pag-angat ng career ni Liza Soberano sa industriya ng showbiz.

Hinala ni Ogie Diaz na maaaring may kinalaman ang talent agency na nilipatan ni Liza sa patuloy na hindi nila pagkakausap.

Samantala, nagbigay rin ng reaksyon si Ogie Diaz sa social media post ng ama ni Liza Soberano, kung saan ibinahagi nito ang pagbati ng ABS-CBN sa kanyang anak. Sa naturang post, tila kinol-out ng ama ng aktres sina Ogie Diaz at Cristy Fermin at tinanong kung ano ang magiging reaksyon nila sa pagbati ng Kapamilya network kay Liza.

Sa sagot ni Ogie Diaz, wala umano siyang ibang masasabi kundi isang malaking “Congratulations” para kay Liza, lalo na’t isa itong malaking tagumpay para sa aktres na mapabilang sa pelikulang “Lisa Frankenstein” sa Hollywood.

Sa kabila ng mga isyu, marami pa rin ang umaasang maayos ang gusot sa pagitan ni Liza Soberano at ng kanyang tita. Habang patuloy siyang umaarangkada sa kanyang international career, hindi rin maikakaila ang mga kontrobersiyang bumabalot sa kanyang personal na buhay at dating professional relationships.