Marami ang nagulat nang isapubliko ng Kapuso comedian na si Buboy Villar ang pagkakaroon niya ng three-month-old son sa bago niyang partner na si Khrizza Mae “Isay” Sampiano.

Kasabay ng pagdiriwang ng 27th birthday ni Buboy ang pagpapakilala niya kay Isay at sa kanilang anak.

Kaugnay nito, marami rin ang gustong malaman ang reaksiyon ng dating partner ni Buboy na si Angillyn Gorens.

Naghiwalay sina Buboy at Angillyn noong 2020 pagkatapos ng apat na taong relasyon.

Mayroon silang dalawang anak — sina Vlanz Karollyn, 7, at George Michael, 5.

ANGILLYN GORENS ON BUBOY VILLAR’S NEW PARTNER

Sa pamamagitan ng Facebook messaging ngayong Lunes, March 24, 2025, kinontak ng PEP.ph (Philippine Entertainment Portal) si Angillyn upang kunan ng pahayag.

Sa Amerika na ngayon nakabase si Angillyn dahil doon siya nagtatrabaho.

Ayon kay Angillyn, walang problema sa kanya na mayroon nang bagong pamilya si Buboy.

Ang ayaw lamang daw niya ay nagagamit ang dalawa nilang anak ni Buboy sa mga panayam o paggawa ng content sa social media ng comedian at bagong partner nito.

Bukod pa rito, nabawasan din daw ang sustentong ibinibigay ni Buboy sa dalawa nilang anak.

Pahayag ni Angillyn sa PEP: “Okay naman kami nung una, pinakilala niya nga buntis na.

“Nag-usap-usap kami nang personal nung last year nung buntis pa si [Isay], sinabihan pa nga namin alagaan niya, e.

“Kaya nga lang, nung lumabas na ang bata, binawasan ang sustento. Hindi na siya nakakadalaw sa mga bata, wala na siyang oras sa kanila.

“Ginagamit lang nila sa interview o content nilang dalawa.”

Bilang isang ina, ayaw raw ni Angillyn ma-expose sa publiko ang mga anak nila ni Buboy lalo na’t menor de edad pa ang mga ito.

Pinabulaanan din ni Angillyn ang sinasabi ni Buboy sa mga interview na ito ang nag-aalaga sa mga anak nila.

Ayon kay Angillyn, ang mga magulang niya ang tooong nag-aasikaso sa mga bata.

Nasa pamilya raw niya ang kanilang dalawang anak at wala sa poder ni Buboy.

Saad niya: “Pero as a mom, ayoko ng ganun. Ilang beses ko na din kinausap na huwag gamitin mga anak ko sa interview o sa content nilang dalawa.

“Tapos lagi sa interview, pinapalabas ni Buboy siya nag-aalaga. Pero sa totoo lang, mama at papa ko at kapatid ko nag-aalaga sa mga bata.”

Hindi na rin daw regular nakakadalaw si Buboy sa mga anak nila.

Litanya ni Angillyn: “Bibisitahin na nga lang, inconsistent pa.

“Tapos taking credit on taking care of the kids or having custody when that’s not even close to the truth.

“It’s my family who’s taking care of them while I’m working in America to provide for the kids.

“And giving the title of a ‘stepmom’ to the girl is irrelevant cause she doesn’t do anything for my kids.”

ANGILLYN ON BUBOY’S FINANCIAL SUPPORT TO THEIR KIDS

Paglilinaw ni Angillyn, walang problema sa kanya kung may bago nang baby si Buboy.

Ang problema niya ay nababawasan na ang oras at sustento ni Buboy sa kanilang dalawang anak ngayong mayroon na itong anak sa ibang babae.

Pahayag ni Angillyn: “We don’t have a problem with them having a baby, but we have a problem with the lack of accountability [from] Buboy for my kids after he had his baby with his new partner.

“Nabawasan yung sustento. Dati naman okay siya magsustento para sa dalawang anak namin.

“Pero yun nga lang, hindi talaga kasya ang sustentong binibigay niya ngayon gawa ng parehas yung mga anak namin nag-aaral na, at private school.

“And they both have yayas gawa ng sobrang tanda na ng magulang ko, nasa 70s na sila.”

Nakikiusap si Angillyn kay Buboy na maging responsableng ama sa kanilang dalawang anak.

Huwag din daw sana nitong ipangalandakan sa publiko na siya lang ang nag-aalaga sa mga bata dahil ang mga magulang at kapatid daw ni Angillyn ang totoong umaaruga sa mga ito.

Sabi ni Angillyn: “I just want him to take accountability and to be fair with my children and his new child.

“And for him to stop taking credit that he’s the one taking care of the kids when it’s really my parents and sister while I’m working in America.

“And for him and his partner to stop posting my children for their content ’cause they’re not the ones taking care of them.”

Nagpadala ang PEP.ph ng direct message sa Instagram ni Buboy para sa kanyang panig tungkol sa mga pahayag ni Angillyn.

Kaagad naming ilalathala ito kapag nakuha na namin ang kanyang sagot.