Pinabulaanan ni Buboy Villar ang alegasyon ng ex-partner niyang si Angillyn Gorens na nakaranas umano ito ng pananakit, pananakal, at pagmumura mula sa komedyante noong magkarelasyon pa sila.

Sa eksklusibong panayam sa kanya ni Nelson Canlas para sa 24 Oras ngayong Huwebes, March 27, 2025, sinabi ni Buboy na ikinagulat niya ang paratang na ito ni Angillyn.

Diin niya: “Dumaan sa buhay ko po na yung tatay ko din ay nananakit sa aking nanay. Alam ko po na mali na manakit ng babae.

“Mahal na mahal ko yung nanay ko kaya kahit kailan hindi ko maisipan na saktan siya [Angillyn]. Malabo po yun.”

Sinagot din ni Buboy ang pahayag ni Angillyn na nabawasan at may pagkakataon din daw na hindi nakapagbibigay ng sustento si Buboy sa kanilang dalawang anak

Paliwanag ni Buboy: “Napag-usapan na po kasi namin yan dati pa sa VAWC [Violence Against Women and their Children].

“Napag-usapan namin ito ng legal at approved ito ng VAWC.

“Last year, I think, last year, medyo mahina po ako sa taon, pero last year yun.

“Nakapag-usap kami, nakipag-meeting ako with ng mommy niya at saka ng daddy niya [Angillyn].

“Nandun kami, nag-usap kami.

“Sinabi ko talaga kung ano yung parang kaya ko as a father.

“Kaya yung mga ganitong pangyayari, alam mo yun, kung isipin kong mabuti po, nakakalungkot. Nakakalungkot,” pagtukoy niya sa pagbanggit ni Angillyn sa isyu ng sustento.

BUBOY VILLAR CHOOSES TO KEEP HIS SIDE OF THE STORY

Sa nasabi ring interview, sinabi ni Buboy na mag-iiwan pa rin siya ng respeto para kay Angillyn at sasarilinin na lang ang panig niya sa mga alegasyon ng dating kinakasama.

Sabi ni Buboy: “Hindi ako parang manira ng tao.

“Kasi yan po yung pinakaayaw ko. Yung may sasabihin ako sa isang tao na hindi naman po totoo.

“Kaya yung mga ganong bagay po, pinagdadasal ko na lang po talaga.”

Ayon pa sa dating child actor, ang mga ganitong usapin ay may tamang lugar at hindi dapat idinadaan sa social media.

Aniya, “Kasi unang-una po sa lahat, yung mga ganitong usapan, nasa tamang venue po ata dapat.”

Binanggit din ng komedyante na nakipag-usap na siya sa ina ni Angillyn tungkol sa isyung kinasasangkutan nila.

May mensahe ba siya kay Angillyn?

Pahayag ni Buboy: “Siguro yung sinasabi po ng utak ko at damdamin, parang kailangan ko muna siguro magpakalma muna.

“Ikalma ko talaga yung sarili ko.

“Kasi yun po, parang kailangan ko kumapit muna siguro sa proseso na ito.

“Kailangan kong yakapin yung sakit at bitawan later on.

“At andun pa rin naman po yung magpatawad.

“Kumbaga, hindi naman po ako… hindi naman po ako ganung klaseng tao na yung sinasabi ng iba na sana ay iayon naman daw sa mukha, ay iayon naman sa ugali.”

BUBOY VILLAR-ANGILLYN GORENS ISSUE

Nagsimula ang isyu sa pagitan nina Buboy at Angillyn nang ipakilala ng aktor ang bago niyang partner na si Khrizza Mae “Isay” Sampiano at ang rebelasyong mayroon na silang three-month-old son.

Noong March 24, 2025, hiningi ng PEP.ph (Philippine Entertainment Portal) ang reaksiyon ni Angillyn sa pagkakaroon ng bagong pamilya ni Buboy.

Ayon kay Angillyn, walang problema sa kanya na mayroon nang bagong pamilya si Buboy.

Ang ayaw lamang daw niya ay nagagamit ang dalawa nilang anak ni Buboy sa mga panayam o paggawa ng content sa social media ng comedian at bagong partner nito.

Bukod pa rito, nabawasan din daw ang sustentong ibinibigay ni Buboy sa dalawa nilang anak at hindi na rin daw ito nakakadalaw sa mga bata.

Pahayag ni Angillyn sa PEP: “Okay naman kami nung una, pinakilala niya nga buntis na.

“Nag-usap-usap kami nang personal nung last year nung buntis pa si [Isay], sinabihan pa nga namin alagaan niya, e.

“Kaya nga lang, nung lumabas na ang bata, binawasan ang sustento. Hindi na siya nakakadalaw sa mga bata, wala na siyang oras sa kanila.

“Ginagamit lang nila sa interview o content nilang dalawa.”

Ngayon pa naman daw na nag-aaral na ang mga bata at may yaya na.

Aniya: “We don’t have a problem with them having a baby, but we have a problem with the lack of accountability [from] Buboy for my kids after he had his baby with his new partner.

“Nabawasan yung sustento. Dati naman okay siya magsustento para sa dalawang anak namin.

“Pero yun nga lang, hindi talaga kasya ang sustentong binibigay niya ngayon gawa ng parehas yung mga anak namin nag-aaral na, at private school.

“And they both have yayas gawa ng sobrang tanda na ng magulang ko, nasa 70s na sila.”

Sa isa namang mahabang rebelasyon sa Facebook nitong nakaraang March 26, sinabi ni Angillyn na sinaktan at sinakal pa siya ni Buboy noon.

Bukod pa rito, minumura rin daw siya nito.

Bahagi ng kanyang post (published as is), “sinasaktan niya ako konting away lang mananakit na dahil alam niyang hindi ako nagsusumbong sa mga magulang ko

“gabi gabi uniinom at pag uwi MAOY tapos ending puro nanaman pananakit at pagmumura sakin sa harap ng 1 year old..

(Ed’s Note: Ang “maoy” ay salitang Bisaya na ang ibig sabihin ay ang paglalabas ng isang taong nakainom ng kanyang sama ng loob.)

“BINANGGA nya yung kotse namin sa araw mismo ng birthday ni vlanz dahil nagtatalo kami ANDUN ANAK KO PERO NAGAWA NIYA YUN

“at walang katapusang panloloko. ilang beses niya ako niloko ng paulit ulit

“pero ano ang ginawa ko? pinatawad ko at umasang baka sakaling mag bago.. pero hanggang huli hindi parin siya nag bago

“wala nakong choice kundi iwan dahil napapagod nakong lokohin napapagod nakong saktan physical…”

Sabi pa ni Angillyn: “sinakal nya ko habang nagpapadede ng anak kong babae ng dahil nadedepress ako WALA AKONG KAIN UMIIYAK AKO

“NAG STAY PA RIN AKO ayokong lumake anak ko na may trauma ng dahil sa ama niya.. buntis ako kay george iniwan ko na siya dahil ayokong makita ng lalaki naming anak na pwedi manakit ng babae..

“HABANG TUMATAGAL LUMALALA PAGIGING VIOLENT NIYA

“masakit mang iwan siya pero kailangan kong gawin dahil baka mapatay nalang niya ako dati.. grabe siya magalit at mag inom..

“maski step father ni Buboy pinagbuhatan ako ng kamay at ipapakulong na sana pero dahil parin sa pagmamahal ko kay buboy inatras namin.”