Nagpa-unlak ng panayam ang indie actress na si Katherine Luna sa Youtube show ni Julius Babao upang taos-pusong humingi ng tawad sa aktor na si Coco Martin.

Kung ating babalikan noong nabuntis si Katherine, ang aktor na si Coco Martin ang itinuturong ama ng kanyang dinadala.

Ngunit kinalaunan, lumabas rin ang katotohanan sa pamamagitan ng isang DNA test na hindi kay Coco ang bata na pinangalanan nilang si ‘Nichole’.

Relasyon ni Katherine Luna at Coco Martin

Nagkakilala sina Katherine at Coco sa isang proyekto na may pamagat na ‘Pagkagat Ng Dilim’, sa panahong ‘yon ay hindi pa kilala si Coco sa mundo ng showbiz at mas sikat pa noon si Katherine.

“Indie actor palang po siya dati..” pagbabahagi ni Katherine kay Julius.

Nagsimula ang relasyon nilang dalawa dahil lagi na silang magkasama hanggang sa parati na siyang dinadalaw ni Coco sa kanyang apartment.

Ani Katherine : “Doon siya nag-sleep over, ilang apartment rin ang nalipatan ko na doon siya natutulog at nakilala siya ng mama ko pero hindi pa siya sikat. Madalas kaming magkita, madalas kaming lumabas tapos biglang nag-stop.

“Lumamya hanggang paminsan-minsan na lang dumalaw sa bahay hanggang [totally] stop na.”

Ang pagbubuntis ni Katherine Luna

Hindi na masyadong nagkikita sina Katherine at Coco nang bigla na lamang may nakilalang isang lalaki ang aktres [one night stand].

Ani Katherine : “nag-hang out kami hanggang sa lumalabas kami and in short may nangyari sa amin. Pagkatapos no’n nagkita pa kami ni Coco sa condo.

“Hinatid niya ako sa condo tapos ‘yun na pala ‘yung last [na pagkikita]. After three months, nabalitaan kong buntis ako siyempre pumasok sa isip ko [si Coco] pero nu’ng time na ‘yun alanganin ako pero feeling ko lang baka siya kasi ‘yung isa, isang beses lang [may nangyari].”

Habang lumalaki na si Nichole, kaliwa’t-kanan na ang mga panayam kay Katherine Luna at binabanggit pa nito na si Coco ang ama ng bata.

Ani Katherine : “Gusto kong iklaro ito ha, ni minsan hindi ko siya hiningan ng pera, wala talaga [nag-swear pa]. Pero nu’ng lumalaki si Nichole parang [duda na], siyempre bilang nanay nakikita mo ‘yung mukha, eh, parang hindi niya kamukha [Ni Coco], iba ‘yung mukha ni Nichole.

“Tapos doon na nabuo sa isip ko na hindi siya ang ama, mga tatlong taon ata si Nichole no’n kaya dumistansiya na ako.

“Ang hirap na lang bawiin kasi unang-una ‘yung bata, anak ko kasi ‘yung pinag-uusapan anong mararamdaman niya? Kaya kapag may nagi-interview sa akin noon nanahimik na ako.

“Kapag may lumalapit sa akin para mag-interview tungkol kay Coco kasi di ba papasikat na si Coco no’n.” dagdag ni Katherine.

DNA test result

Hanggang isang araw, pinakuha umano ni Coco si Nichole mula sa ina ni Katherine na walang ka alam-alam ang aktres.

Dito na isinagawa ang isang DNA test sa pagitan nina Coco at Nichole, negative ang naging resulta.

Dito na humingi ng tawad si Katherine kay Coco Martin dahil sa kanyang mga nagawa, dahil na rin sa kanyang mga nasabi noon sa mga panayam.

Aniya : “Hindi ko lang alam kung paano ko sasabihin sa kanya [Coco] kasi pinangungunahan ako ng hiya, Gusto ko patay na ang isyu kaya nagtatago na ako noon [kay Coco].

“Masaya ako para sa kanya sa mga nangyari sa kanya kasi deserved niya ‘yun. Nu’ng nasa indie-indie palang siya pinush niya ‘yun pinursige niya ‘yun, taong determinado,”

“Pero ikaw [Coco], tinry mo pa ring malinawan at mahal mo si Nichole pero ‘yun nga, sorry kasi nagkamali ako dala ng kabataan, dala ng maling nagawa ko noon na pati ikaw nagulo ang buhay mo. Humihingi ako ng dispensa at sana mapatawad mo ako balang araw.” dagdag ng aktres.