“I’m so happy and I’m so proud of myself that I’m finally out.”

Ito ang deklarasyon ng Pinoy Big Brother Celebrity (PBB) Collab Edition housemate na si Klarisse de Guzman matapos amining isa siyang bisexual.

Ito ang highlight ng PBB episode ngayong gabi ng Miyerkules, April 2, 2025.

Bukod sa pag-amin tungkol sa kanyang sexual orientation, masaya ring ibinahagi ni Klarisse sa fellow housemates na four years na siyang nasa same-sex relationship sa partner niyang si “Trina.”

KLARISSE COMES OUT

Ang pag-amin ni Klarisse ay parte ng task na iniatas sa PBB house guest na si Michelle Dee.

Ang bawat housemate ay binigyan ng pagkakataong ipakilala nang lubos ang kanilang sarili.

Nang si Klarisse na ang umupo sa “trono,” sinabi niyang tumanggi siya noong una na sumali sa PBB.

“Tagal kong pinag-isipan kung sasali ako ng PBB kasi hindi ko alam kung kaya ko i-expose ang buhay ko,” pag-amin ng The Voice of the Philippines Season 1 runner-up.

Pinag-isipan daw nang husto ni Klarisse kung kaya niyang isapubliko ang kanyang buhay.

“Obviously, nandito ako, so kinaya ko,” sambit niya.

Pagkatapos nito ay ibinunyag na ni Klarisse ang matagal na niyang inililihim sa publiko.

Pahayag niya: “Tingin ko eto na yung time para sabihin sa inyo lahat, and to tell the world that I’m not straight.

“I am bi [bisexual].

“Yung kinukuwento ko sa inyo na may four years akong partner, yes, I have a partner for four years.

“Her name is Trina.”

Dagdag ni Klarisse, bagamat hindi alam ng publiko ang tungkol sa kanyang sekswalidad, open siya sa mga magulang at mga kamag-anak niya.

“Alam ng parents ko, bago mawala ang papa ko… alam ng mama ko, and kasama ngayon ng mama ko is her [Trina].

“And I guess kumportable na akong sabihin sa inyong lahat, with Michelle Dee pa.”

Si Michelle ay aminado ring bisexual, at parte ito ng kanyang advocacy.

Sinabi rin ni Klarisse na excited siyang ipakilala ang kanyang partner sa fellow housemates niya.

“And I miss her,” saad niya ukol sa karelasyon.

“Sobrang suwerte ko lang talaga kasi tanggap ako ng parents ko.

“Di ako nahirapan sa phase na iyon. Even most… some of my relatives alam.

“But di ko lang nasasabi sa work ko, so I am proud…”

KLARISSE HAPPY ABOUT HER ADMISSION

Ipinalabas din ang pakikipag-usap ni Klarisse kay Big Brother sa loob ng confession room.

Inilahad dito ni Klarisse kung bakit niya inilihim ang tungkol sa kanyang sexuality.

Paliwanag niya: “Tinago ko po yung totoo about my preference, my sexuality, dahil natatakot po ako, Kuya. Natatakot po ako, yun lang po.

“Natatakot ako ma-judge, natatakot po ako baka hindi ako maintindihan ng ibang tao…

“Natatakot po ako na baka magbago ang tingin sa akin ng mga sumusuporta sa akin, or maapektuhan po yung career ko.”

Ang mga alalahaning ito ang dahilan kaya itinago niya ang tungkol sa kanyang same-sex relationship sa loob ng apat na taon.

“Kumbaga, public, mga taong kasama ko sa work industry na lang po ang siguro di nakakaalam, and I think this is the best time,” sabi ng singer.

Sa isang punto ay nabanggit din ni Klarisse na “out” din ang kanyang partner.

Klarisse says she feels relieved after finally revealing that she is bisexual. 
Photo/s: Kapamilya Online Live on YouTube

Ibinahagi rin ni Klarisse ang kanyang nararamdaman matapos aminin sa kanyang housemates at sa publiko ang tunay niyang sekswalidad.

Saad niya: “Napakasarap po sa pakiramdam. Eto pala ang feeling ng malaya.

“Kumbaga, free, wala akong iniisip ngayon kundi finally nasabi ko na, naging bukas na po ako sa lahat ng tao.

“Ang sarap ng pakiramdam na dito sa mga kasama kong housemates natutuwa po sila, napakatapang ko raw…

“Ako din po, sobrang saya ko na, finally, wala na akong tinatago. Malaya na po ako.”

Dagdag pa ni Klarisse: “Nasabi ko na po yung totoo. Di na ako takot, wala na akong kinakatakutan.

“Ready na ako kung ano man ang itatanong nila [housemates]. Kumbaga, wala nang walls.”

Hangad lang daw ni Klarisse: “Sana tanggap pa rin ako ng mga tao.

“Sarap lang po sa pakiramdam na magpakatotoo.”

TRINA PROUD OF KLARISSE

Pagkatapos umere ng PBB Celebrity Collab ngayong gabi ay nag-iwan ng mensahe ang partner ni Klarisse na si Christrina Rey, sa pamamagitan ng social media, upang ihayag kung gaano siya ka-proud sa karelasyong singer.

Mensahe ni Trina: “I AM PROUD OF YOU! I’m always here, always!

“I’ll wait [for] u here sa outside world.

“Love Wins.”