Sino kaya ang tinutukoy ni Chloe San Jose na kilala umano niya matapos mag-comment sa post ng social media personality na si Senyora?

Sa Facebook ngayong Lunes, March 3, 2025, ni-repost ni Senyora ang isang page na nagbahagi ng latest na patama umano ni Raquel Pempengco sa anak na si Jake Zyrus.

Kaugnay ito ng pagba-viral ng librong isinulat ni Jake noong 2018, ang I AM JAKE.

Nakasaad sa caption (published as is): “WALANG UTANG NA LOOB

“Naglabas nga ng pahayag ang ina ni Jake Zyrus na si Raquel Pempengco tungkol sa isinulat ng anak sa kanyang libro tungkol sa pangaabusong naranasan nito sa kanyang tiyuhin na isinawalang bahala umano ni Raquel.

“’Peace of mind pa rin ang pipiliin ko kesa patulan ko ang mga walang kwentang tao at mga walang utang na loob…sila na magdadala ng lahat. The truth still prevails… Sige lang kahit ano ibato nio basta hinde nakakabawas ng kagandahan ko…wala pa rin akong pake.’ saad ng ina ni Jake. ”

Komento ni Senyora sa kanyang post, “May ganyan palang nanay”

CHLOE SAN JOSE: “meron pa akong kakilala”

Sa comments section ng post ni Senyora, agaw-pansin ang komento ni Chloe San Jose, ang girlfriend ni two-time Paris Olympics gold medalist Carlos Yulo.

Tila patutsada ni Chloe: “meron pa akong kakilala, ganyang ganyan din Senyora..”

Sagot naman sa kanya ni Senyora: “Chloe yan ka na naman! Kaya gigil sayo mga matatanda e”

Hindi malinaw kung sino ang tinutukoy ni Chloe sa kanyang komento.

CHLOE SAN JOSE VS ANGELICA YULO

Pero hindi maiwasang ikonekta ang nakakaintrigang komento ni Chloe sa napaulat na word war niya sa dalawang “nanay.”

Ito ay ang mismong ina ni Carlos na si Angelica Yulo at ang comedienne na si Ai-Ai delas Alas.

Unang nakabangga ni Chloe si Angelica.

Inakusahan umano ni Angelica si Chloe na sumisira sa karera ng anak at inilalayo ang loob ni Carlos sa sarili nitong pamilya.

Hanggang sa hindi na matiis ni Chloe ang mga nakakarating sa kanya kaya siya na mismo ang nag-post ng screenshots ng mga umano’y patutsada ni Angelica laban sa kanya.

Ayon kay Chloe, sinubukan nila ni Carlos na makipag-ayos sa pamilya ng boyfriend ngunit tumalikod daw si Angelica na tila ayaw nitong maayos ang kanilang gusot.

Sinubukan pa umano ng ina ni Chloe na kausapin si Angelica para sana sa “mother to another mother” talk. Pero, wala pa rin daw nangyari at patuloy umano siyang sinisiraan ng ina ni Carlos sa mga post nito.

Saad ni Chloe sa isang Facebook post noong September 2024: “on top of that, a few months before this gc was made, my mum from australia flew back to manila and talked to her in person and asked her to stop posting about me. a talk from a mother to another mother, however she still kept going defaming me on her posts. now tell me we don’t have the right to react to this kind of behaviour.

“if you’re gonna post screenshots of messages, make sure it’s in the right order. don’t just post it and make the others look bad, when in the first place you started all this and we just responded.

“PEACE”

CHLOE SAN JOSE VS AI-AI DELAS ALAS

Sunod namang nakabangga ni Chloe si Ai-Ai.

Noong September 12, 2024, sa pamamagitan ng live video, nagbigay ng payo si Ai-Ai kay Chloe sa pakikipagrelasyon, partikular na ang tamang pakikitungo at pagrespeto nito sa ina ni Carlos na si Angelica.

Ito ay sa gitna ng pasaringan nina Chloe at Angelica makaraang mailantad sa publiko na hindi boto si Angelica kay Chloe para sa anak niyang si Carlos.

Ayon kay Ai-Ai, nakikita at nababasa niya sa social media ang pasaringan ng dalawa. Labis daw niya itong ikinakalungkot dahil bilang isa ring ina ay ramdam niya kung gaano nasasaktan ang ina ni Carlos.

Pahayag noon ni Ai-Ai kay Chloe: “Kasi nanay yan, e. Kung wala yung nanay niya, wala kang darling ngayon. Kaya, girl, huwag mo siyang aawayin.

“Tsaka hindi ka pa asawa, girl. Girlfriend ka pa lang.

“Kapag asawa ka na, puwede na. Pero kapag girlfriend pa lang girl, huwag mo munang awayin.

“Kasi alam mo naman ang mga mommy, di ba? Isa yan sa mga way na magiging harmonious ang inyong relationship.”

Makalipas ang ilang buwan, binalikan ni Chloe ang artikulong nailathala tungkol sa naging payo noon sa kanya ni Ai-Ai, sa pamamagitan ng pagsi-share nito sa kanyang Facebook account noong November 12, 2024.

Ginawa ito ni Chloe matapos isapuliko ni Ai-Ai na hiwalay na sila ng kanyang asawang si Gerald Sibayan.

Mababasang caption ni Chloe sa kanyang shared post (published as is): “Back to you mamang, hindi para pagtawanan ang sitwasyon mo pero ang ginagawa mo sa iba ay babalik din sa’yo ng 10x ‍—it’s just the universe’s law.”

Pero sino nga kaya ang tinutukoy ni Chloe na “kakilala” niyang katulad ng ina ni Jake Zyrus?