Hangad ni Rey “PJ Abellana” na magkabalikan ang anak niyang si Carla Abellana at ang mister nitong si Tom Rodriguez.

Ikinasal sina Tom at Carla sa Tagaytay noong October 23, 2021 pagkatapos ng pitong taong relasyon bilang magkasintahan.

Pero pagkalipas lamang ng tatlong buwan, noong January 2022, ay napabalitang hiwalay na sila.

Kinumpirma ni PJ ang paghihiwalay nina Carla at Tom sa panayam sa kanya ni Cristy Fermin noong March 11, 2022. Sinabi rin ng beteranong aktor na nagkaroon umano ng one-night stand si Tom na siyang dahilan ng paghihiwalay nila ni Carla.

Pero makalipas lamang ang ilang araw ay binawi ni PJ ang kanyang naging pahayag dahil nagalit sa kanya si Carla.

Nakapanayam namin si PJ sa DZRH nung nakaraang Miyerkules, November 30, 2022, dahil nagpu-promote siya ng Metro Manila Film Festival (MMFF) 2022 entry ng Borracho Films na Mamasapano: Now It Can Be Told.

Ang paniniwala ng aktor, kahit masasabing ex mo na ang isang tao, nandiyan pa rin ang pagmamahal.

Ganun daw kasi si PJ na kahit matagal na niyang nakahiwalayan ang isang babae, may naiwan pa rin siyang pagmamahal dio.

Pahayag ni PJ, “Alam niyo, honestly, based from my case, based from my experience, if you were to ask me kung posible ba yung dati ko, babalikan ko pa?

“Inspite of the lapse of time, changes, at everything, maraming nagbago. Pag tinanong mo ako, na may chance pa kaya na ang dati mo ay babalikan mo pa?

“Speaking from myself, ha? Ako, posibleng mabalikan ko pa yung dati.

“Kasi alam niyo ba kung bakit? Minahal mo rin kasi yung taong yan. Natutunan mo na ring mahalin yan.”

Dagdag niya, “Alam mo minsan, yung pagmamahal na yan, hindi naman nawawala yan, e. Pag mahal mo yung tao, mahal mo na yan e.

“So, it’s possible. Posibleng mabalikan ko yung dati ko. Possible.”

Kaya ganun din daw sana ang hangarin niya kay Tom at sa kanyang anak na, sana, magkabalikan sila.

Saad niya, “There’s always a second time around, you know. There’s always a second chance again.

“Ako, gusto ko dahil in favor ako sa kanilang dalawa.”

Sa lahat ng mga nakarelasyon ni Carla, si Tom daw ang pinakagusto ni PJ.

Nung nagkaproblema ang mag-asawa, kinausap daw siya ni Tom para ibahagi ang pinagdaanan nila ni Carla.

Lahad ni PJ, “First of all, si Tom ang lumapit sa akin before he left for the States. Siya yung pumunta sa akin, at nag-open up sa akin.

“We talked one on one, at I saw the guy… I even told him na if worse comes to worst, ‘I still address you as my son.’ Yan ang sinabi ko sa kanya.

“Sinabi ko, ‘Kasal ka na sa anak ko, e. Certified ka na sa anak ko. Legit ka na. So, I should consider you as my son as well.’

“So, nakikita ko kay Tom na kabutihan naman ang ipinakita niya sa akin.

“All the while, the last I saw him, I’m in favor of Tom. Wala akong against kay Tom.

“And I would still say na boto pa rin ako sa kanilang dalawa… supposedly.”

Kaya nang tinanong kung ano ang Christmas gift niya sa kanyang anak, makahulugang sagot ni Rey: “Ang ireregalo ko sa anak ko, si Tom. Ang ireregalo ko kay Tom, yung anak ko. Yun lang yun.”

Hanggang ngayon ay hindi pa rin daw nagkakausap ang mag-amang PJ at Carla Abellana.

Maaring nagtatampo pa raw si Carla kay PJ dahil sa pagsasalita nito nung kainitan ng isyung hiwalayan ng aktres at ni Tom.

“Maaring may tampo sa akin yung aking anak. Pero minsan kasi ang bata ay mas hindi nakakaintindi sa matanda nang lubusan,” sabi ni PJ.

“Kasi, I would say ang mas matanda ay malalim kasing mag-isip yan, at yung kaisipan ng mas matanda ay malalim yan dun sa kaisipan ng mas bata.

“Marahil ay hindi masyadong naabot ng bata yung lalim ng kaisipan ng gustong mangyari ng mas nakakatanda.

“Kaya minsan may nangyayaring sitwasyon na akala mo mali sa kanya, pero tama naman supposedly yung sadya ng mas matanda kung papano nangyari yun.”

Gusto raw niyang iparating kay Carla na nandiyan lang siya kapag handa na siyang pag-usapan ang kanyang pinagdaanan.

“Honestly, I am just here. I’ve been always here. Nandito lang ako palagi para sa kanila.

“Sa lahat ng oras ko kahit busy ako, ready ako, dito lang ako para sa kanila. Nasa kanila kung bibigyan nila ng oras ang sarili nila para magkakasama-sama para magkita kami.

“Lately, from what happened from the previous issue with Carla, I would say na up to this point, hindi pa rin nag-o-open up sa akin ang aking anak.

“Hindi ko pinipilit yan, hindi ko pinagpilitan yung sarili ko. I let it be to the point na hinahayaan ko sila, na sila yung magkusa.

“Kung kailangan nila ako, especially, lumapit sila sa akin, bumulong sila sa akin, tawagan nila ako anytime, nandito lang ako para sa kanila.”

Nakakalungkot yung ganito na sa media pa ipinadadaan ng ama ang kanyang saloobin tungkol sa kanyang anak.

May asiwa factor din na bukod sa personal na buhay na ito nina Tom at Carla na mga adults na, ay heto pa ang dagdag na layer ng iintindihin — ang panig ng tatay na halos walang komunikasyon sa anak.

Isa pang medyo asiwa at nasa konteksto ang interview na ito sa promo ng isang pelikula.

Sa akin lang, parang may discomfort. Parang may pagka-off sa sitwasyon at nabitawang statement.

Sa mga ganito, mas kagalang-galang pa ang silence.