Pumanaw na ang veteran comedienne na si Matutina, Evelyn Bontogan Guerrero sa tunay na buhay, ngayong Araw ng mga Puso, February 14, 2025.

Siya ay 78.

Kinumpirma ng anak ni Matutina na si Shiela Guerrero ang malungkot na balita sa GMA News Online sa pamamagitan ng Facebook messenger ngayong umaga.

Acute respiratory failure ang nakasaad na cause of death sa medical certificate ni Matutina.

Nagsimula ang career ni Matutina sa showbiz industry bilang voice talent sa radyo, kung saan nagboboses siya ng iba’t ibang karakter — babae, lalake, bata, at matanda — sa mga drama sa radyo.

Isa rin siya sa mga pioneer sa larangan ng dubbing sa Pilipinas, kung saan dina-dub niya ang mga karakter na napapanood sa mga cartoon at mga palabas na galing sa ibang bansa.

JOHN EN MARSHA

Ngunit nakilala nang husto si Matutina nang gumanap siya bilang kasambahay ni Doña Delilah Jones (ginampanan ni Dely Atay-Atayan) sa sikat na comedy series na John en Marsha, na pinagbidahan nina Comedy King Dolphy at Nida Blanca sa title roles.

Dito unang ginamit ni Matutina ang kanyang screen name.

Sa kanyang panayam kay Julius Babao noong October 2024, ikinuwento ni Matutina na siya mismo ang nag-suggest sa direktor ng John en Marsha na si Ading Fernando na “Matutina” ang gamiting screen name niya.

Iminungkahi rin niya kay Ading na gawing matinis ang boses ng kanyang karakter upang maiba sa mga ginagawa niya sa radyo.

Umere ang John en Marsha mula 1974 hanggang 1978, at bumalik ito sa ere mula 1980 hanggang 1990, sa RPN-9.

Nagkaroon din ito ng maraming spin-off sa pellikula.

Sa pagpanaw ni Matutina, si Maricel na lang ang natitirang buhay sa original cast members ng John en Marsha.