Sa kabila ng masakit na katotohanang hiniwalayan siya ni Gerald Sibayan sa pamamagitan lamang ng text message, tiniyak ni Ai-Ai delas Alas na hindi niya babawiin ang petisyon ng asawa para magkaroon ito ng green card at maging legal ang paninirahan nito sa Amerika.

“Greencard holder ako, ipinetisyon ko siya as husband so approved na yun. Naghihintay lang siya ng green card,” pahayag ni Ai-Ai sa panayam niya sa Fast Talk With Boy Abunda ngayong Lunes, November 11, 2024.

Tanong sa kanya ni Boy Abunda, na kanya ring longtime talent manager, “May speculations na dahil ikaw ang nag-petition, ipapa-revoke mo raw ang mga papel ni Gerald.”

Pahaya ni Ai-Ai:“ Siyempre, kapag initial, buwisit ka, kung anu-ano ang nasasabi mo, pero hindi ko naman gagawin yon.

“Siyempre, husband ko pa rin siya and parang help ko na yon sa kanya para magkaroon siya ng legal status sa Amerika.

“Hindi naman niya sinabi na i-sacrifice ang career ko, pero kaya talaga ako parating nasa Amerika, para samahan siya.

“Pero under contract pa rin ako sa GMA so talagang ginagawa ko na ten days, nasa Amerika ako, ten days nasa Pilipinas ako.

“Ang hirap talaga. Actually, nagkaroon ako ng eye twitching dahil siguro sa sobrang jetlag, pabalik-balik, para makasama ko siya at para masabi ko na kahit papaano, kahit malayo ako, ginagawa ko pa rin ang mga obligasyon ko as a wife.”

DID AI-AI DOUBT GERALD’S LOVE FOR HER?

Tanong ni Boy kay Ai-Ai, “Nagduda ka ba sa pagmamahal ni Gerald sa iyo? Did he ever loved you? Minahal ka ba ni Gerald?”

Sabi ni Ai-Ai, “Nung madaling-araw na yon, naisip ko na hindi naman kami tatagal ng ten years kung hindi niya ako minahal.

“Pero nang dumaloy na ang mga araw, marami na akong naisip. Kumbaga, nag-rewind ako, ‘Ah, kaya pala.’ So, I think half-half.

“Baka more of… baka lang ha? Baka na-starstruck or whatever. Baka na-thrill din siya na, ‘Ako yung asawa ni Ai-Ai.Parang ganoon…”

Madaling-araw ng Oktubre 14, 2024, 2 A.M., nang matanggap ni Ai-Ai ang text message ni Gerald na nagsasabing nakikipaghiwalay na siya. Ayon kay Gerald, gusto niyang magkaanak at hindi na siya masaya sa relasyon nila.

Boy: “Nakapagpatawad ka na at gaano ka kalakas ngayon para makapagsimula?”

Tugon ni Ai-Ai: “Madali kasing sabihin yung pagpapatawad, e, pero gusto ko, kung patatawarin ko siya, yung talagang buong-buo sa puso ko.

“Kasi ngayon, at this point, nasa process pa ako ng… pina-process ko pa lahat. Bakit, anong nangyari?

“Sobrang lakas ko ngayon kasi kailangan kong buuin ang sarili ko. Moving forward.

“Tapos yung mga hindi ko nagawa noon, gagawin ko ngayon.

“Like, pupunta ako sa Siargao, sa Medjugorje [sa Bosnia and Herzegovina], and ipu-fullfill ko kung ano yung gusto ni Lord para sa akin. Tingin ko, may gusto Siyang ipagagawa sa akin.

“As long as nandiyan si Mama Mary at si Lord sa buhay, na constant naman na never in my life na iniwan ako ng Panginoon at ng Mahal na Ina, game ako.”

AI-AI DELAS ALAS ON SPEAKING UP ABOUT HER SEPARATION

Ang unang balak ni Ai-Ai ay manahimik at huwag nang isiwalat sa publiko na hiniwalayan siya ni Gerald.

Pero nagbago raw ang desisyon nito dahil nangibabaw ang kanyang paniniwalang karapatan ng mga tao na malaman ang mga nangyayari sa personal na buhay niya.

Saad niya: “Nahihirapan akong itago, and I owe it to the public, kasi ever since naman nag-start ako sa show business, open book ang buhay ko sa kanila.

“Mahirap magsinungaling. Truth is easier. So, at least ngayon, parang freedom.

“Super pray talaga ako. Sabi ko, ‘Lord, baguhin Mo ako. Bigyan Mo ako ng bagong puso—a peaceful heart, a joyful heart, a healing heart.’

“At saka yung pagpapatawad kasi konti na lang ang ilalagi ko sa mundo. Gusto ko naman na mag-leave ako ng legacy ko na, ‘Ay, si Ai-Ai, iba na siya ngayon. Tahimik na siya. Hindi na siya maingay. Hindi na siya magulo. Kahit ano ang nangyari sa kanya, she’s always thankful and positive.’

“So, yun man lang, masabi ko sa inyong lahat na may magandang mangyayari pa sa atin, kahit may nangyari na hindi maganda.

“Let’s move forward and positive love na may magbibigay at may magandang mangyayari sa atin na regalo ng Panginoon.”

IS AI-AI READY TO TALK TO GERALD?

Handa na ba si Ai-Ai na makipag-usap kay Gerald?

“Siguro ngayon, hindi muna, pero in God’s time. In God’s perfect time,” sagot niya.

Pero hindi nag-atubili si Ai-Ai na magbigay ng mensahe sa mister na nang-iwan sa kanya.

Aniya: “I hope yung hindi ko pa naibigay sa yo na hinahanap mo na kaligayahan, sana makuha mo.

“Yung hinihiling mong anak, sana magkaroon ka ng healthy child… I wish you well.

“Kasi sa sampung taon na pinagsamahan natin, in fairness naman to you, naging good husband ka naman.

“Siguro ganoon talaga ang buhay. Basta sana maging masaya ka na, and I wish you all happiness na hinahanap mo.”

Ngayong Lunes, November 11, ang ika-60 na kaarawan ni Ai-Ai.

Pero pinili niyang huwag nang magkaroon ng pagdiriwang dahil sa malungkot na pangyayari sa kanyang buhay.