Sina Piolo Pascual at Kim Chiu ang tinanghal na pinakamalaking acting winners sa 38th Star Awards for Television.

Ginanap ang event, linggo ng gabi, March 23, 2025, sa Dolphy Theater sa ABS-CBN Compound sa Quezon City.

Ang Philippine Movie Press Club, Inc. (PMPC) ang nag-organisa ng awards ceremony.

Itinanghal na Best Drama Actor si Piolo para sa Pamilya Sagrado, at si Kim ang Best Drama Actress para sa Linlang. Ang dalawang drama series ay kapwa ipinalabas sa TV5 at A2Z.

Mangiyak-ngiyak na tinanggap ni Kim ang kanyang tropeyo at buong-pusong nagpasalamat sa ilang tao na nakatulong sa kanyang unang bida-kontrabida role sa telebisyon.

Wagi bilang Best TV Station, ang pinakamataas na parangal, ang GMA-7. Walang prankisa ang ABS-CBN, na dating kasabayan ng GMA-7 bilang major broadcasting station sa bansa.

Sa iba pang major categories ay nasungkit ni Janine Gutierrez ang Best Drama Supporting Actress para sa kanyang mahusay na pagkakaganap sa seryeng Lavender Fields na umeere sa TV5 at A2Z.

Nag-tie naman sa kategoryang Best Drama Supporting Actor sina Dennis Trillo para sa Pulang Araw (GMA-7) at Arnold Reyes para sa My Guardian Alien (GMA-7).

Personal na tinanggap ni Coco Martin at ng mga direktor ng FPJ’s Batang Quiapo ang tropeyo bilang Best Primetime TV Series (TV5, A2Z).

Wagi bilang Best Variety Show ang It’s Showtime, at si Anne Curtis ang tinanghal na Best Female TV Host sa parehong noontime show.

Si Vic Sotto ng Eat Bulaga! ang nag-uwi ng parangal bilang Best Male TV Host (TV5, RPTV).

Naging emosyunal si Janice de Belen na recipient ng Ading Fernando Lifetime Achievement Award.

Ito ang pinakamataas na rekognisyon para sa isang artista o TV host na ginawad sa Star Awards.

Nagbalik-tanaw si Janice sa kanyang pagsisimula bilang child star noong 1978.

Si Julius Babao ang binigyan ng Excellence in Broadcasting Lifetime Achievement Award. Ang nag-abot ng tropeyo kay Julius ay si Jake Maderazo, isang haligi ng ABS-CBN News and Public Affairs.

Tilian ang fans nang umakyat sa entablado sina Kim Chiu at Paulo Avelino ng ABS-CBN at sina Barbie Forteza at David Licauco ng GMA-7 na nakatanggap ng German Moreno Power Tandem.

Ang special award na ito mula sa German Moreno Foundation ni Master Showman German Moreno, aka Kuya Germs, ay tradisyong iginagawad tuwing Star Awards for Television.

Madamdamin ring tinanggap ni Maritess Gutierrez ang plake ng pagkilala ng PMPC para sa kanyang namayapang inang si Gloria Romero. Binigyan ng special tribute si Gloria bilang isa sa Icons of Philippine Television at inalayan ng bonggang awitin ni Concert King Martin Nievera.

Sa pamumuno ng batikang dokumenarista na si Howie Severino, naroon din ang i-Witness team ng GMA-7, upang tanggapin ang PMPC Hall of Fame Award as Best Documentary Program. May 15 beses nang nanalo ang docu show sa mga nakalipas na taon.

Ang 38th Star Awards for Television ay mula sa Airtime Marketing ni Tess Celestino-Howard at ang director ay si Eric Quizon.

Ang pagbibigay-parangal na ito ay mula sa PMPC Star Awards, sa pamumuno ni Mell Navarro, PMPC president, at Rodel Fernando, over-all chairman.