Finding Kenneth!

Ito ngayon ang ginagawa ng fans ng Kapamilya superstar na si Kathryn Bernardo makaraan niyang isapubliko ang pangalan ng kanyang kauna-unahang crush.

Sa episode ng Pilipinas Got Talent noong April 6, 2025, ibinuking ng judges na sina Kathryn, Donny Pangilinan, Eugene Domingo, at Freddie M. Garcia o FMG, at hosts na sina Melai Cantiveros at Robi Domingo kung sino ang kanilang mga unang crush.

First crush ni Kathryn Bernardo biglang naging famous

Sina Eugene, Melai, at FMG ay pare-parehong nagsabi na ang kanilang unang crush ay kapitbahay nila noong kanilang kabataan.

Si Robi naman ay inaming ang unang crush ay ang aktres na si Shaina Magdayao, habang si Donny naman ay ang American actress na si Natalie Portman.

 

KATHRYN REVEALS HER FIRST-EVER CRUSH

Nang si Kathryn na ang tanungin, sinabi nitong ang unang crush niya ay non-showbiz.

Nasa probinsiya pa raw siya sa Cabanatuan City nang magka-crush noong Grade 2 pa lamang siya.

 

Pag-amin ni Kathryn: “Ang first-ever crush ko, siguro Grade 2 ako nun sa probinsiya namin.

“Yung first ever, mestizo siya. mestizo siya.”

 

Ngunit hanggang paghanga lang daw ang ginawa ni Kathryn dahil hindi kailanman nalaman ng kanyang crush na gusto siya ng aktres.

Paliwanag ni Kathryn: “E, kapag crush ko, mas lalo ko yun hindi kakausapin.

“Mas lalong hindi mo talaga mararamdaman, kahit isabit mo ako, hindi ko aaminin na crush kita, yung ganun.”

 

Sa puntong ito ay pinilit ni Melai si Kathryn na sabihin ang pangalan ng kanyang first-ever crush.

Hindi naman nagdalawang-isip ang aktres na ito’y pangalanan.

“Okay. Ang name niya ay Kenneth,” nakangiting sabi ni Kathryn.

Kathryn Bernardo names her first-ever crush

Kathryn Bernardo gets candid about her first-ever crush. 
Photo/s: Screengrab Pilipinas Got Talent on YouTube

NETIZENS’ SEARCH FOR KENNETH

Mabilis na pinag-usapan online ang pag-amin na ito ni Kathryn.

Sa X (dating Twitter), mapapansin na kanya-kanya ng paghahanap ang netizens sa “Kenneth” na sinasabi ng aktres na dati nitong crush.

“Kenneth, na classmate ni Kathryn nung grade 2, kung nababasa mo ito, ikaw ang first crush ni Kathryn Bernardo!!! HAHAHAHAHAH,” tweet ng isang netizen.

Saad pa ng isa (published as is), “So, umpisahan ko na bang isa-isahin yung Kenneth dito sa Cabanatuan, Kathryn? Hahahaha! Na-curious tuloy ako bigla! How lucky you are, Kenneth hahaha naging crush ka lang naman ng isang Kathryn Bernardo.”

Sabi pa ng isa (published as is), “Kaloka iyong powers ni Kathryn mader. the search for Kenneth na dating crush ni Kathryn continues…”

May ilang netizens ang nakahanap sa diumano’y Kenneth na sinasabi ni Kathryn.

Ayon sa kanilang paghahanap, doktor na raw ngayon ang dating crush ni Kathryn.

Habang isinusulat ang artikulong ito ay hindi pa nakukumpirma kung ito ba talaga ang Kenneth na tinutukoy ng Kapamilya actress.