Idinaan na lang sa laughing emojis ni Albie Casiño ang reply niya sa isang netizen na bumanggit sa pangalan ng ex-girlfriend nitong si Andi Eigenmann.

Ito ay sa gitna ng hidwaan ni Andi at fiancé nitong si Philmar Alipayo.

May kaugnayan ito sa pagkakaroon ng “couple tattoo” ni Philmar at ng kaibigan nito, ang Siargao-based Swedish marine photographer Pernilla Sjoö.

Ayon kay Andi ay hindi ito ipinaalam ni Philmar sa kanya.

Kasabay ng gulo sa relasyon nina Andi at Philmar ay ang pagpu-post naman sa Instagram ng non-showbiz girlfriend ni Albie na si Michelina ng larawan nila ng aktor habang sila ay nagde-date noong February 7, 2025.

Sa post ni Michelina ay naka-tag si Albie.

Kalakip nito ang caption na (published as is), “Date night @oliverscoffeebistro. Thank you so much @oliverscoffeebistro & @lyn_inductivo !! Everything was so sarap!”

Sa comments section ng post ni Michelina ay may isang netizen na nagkomento ng (published as is), “dodged a bullet with andi that’s for sure.”

Bagay na nireplayan lamang ni Albie ng laughing in tears emoji.

NETIZENS’ REACTION

Marami ring netizens na nagkomento sa post ni Michelina ang nagbalik-tanaw sa pinagdaanan ni Albie nang karelasyon pa nito si Andi at nang maghiwalay sila.

Anila, muling na-“vindicate” si Albie na biktima umano ng pagsisinungaling at paninira noon ni Andi sa kanya.

Komento ng isang netizen, “You were vindicated again.”

Saad ng isa, “Justice has prevailed.”

May iba pang kinukonekta ang pinagdaraanan ngayon ni Andi sa pinagdaanan noon ni Albie.

Sabi ng isa, “Na karma din c andi. Kawawa kasi to c albie dati. Happy to see albie being content with his fam

“Ikaw ba naman pina bugbog ng pamilya at sinira ang career at the peak of his showbiz career kase pinaratangang tatay ng anak ni Andi kase dineny ni Jake Ejercito? Ending, hindi naman pala siya ang tatay. kaya okay lang yan Albie to never forget. Just sit and watch while eating popcorn on the side. Let the law of karma align and work on your favor,” dagdag pa ng isa.

Ang tinutukoy ng netizens ay ang masalimuot na nakaraan noon nina Albie at Andi.

A BITTER PAST of albie and andi

Lumikha ng malaking kontrobersiya ang breakup nina Andi at Albie noong 2011, matapos idiin ni Andi na si Albie ang ama ng noo’y ipinagbubuntis niya.

Noong mga panahong iyon ay 20 taong gulang si Andi at kalulunsad lang bilang lead star sa Kapamilya primetime series na Agua Bendita (2010).

Habang si Albie naman ay 18 years old lamang noon at lumalabas sa primetime series na Mara Clara (2010) bilang leading man ni Kathryn Bernardo.

Bukod kay Albie, lumutang din ang pangalan ni Jake Ejercito bilang ama ng batang nasa sinapupunan ni Andi.

Sinasabing si Jake ang naging boyfriend ni Andi matapos nitong makipaghiwalay kay Albie, ngunit nagkabalikan sina Andi at Albie nang bumalik sa London si Jake.

Sa kabila ng agam-agam, nanindigan si Andi noong September 2011 na si Albie ang ama ng kanyang dinadala.

Bunsod nito, marami ang nagalit kay Albie, binugbog siya ng ilang nasa kampo ni Andi, at nangyaring nag-stall ang kanyang career ng ilang taon.

November 23, 2011 ay isinilang ni Andi ang kanyang anak na babae, via caesarean section.

Sa sumunod na limang taon, hindi malinaw kung sino kina Albie at Jake ang ama ng anak ni Andi.

Hanggang noong September 2016, isiniwalat ni Max Eigenmann, half-sister ni Andi, sa podcast ng Good Times With Mo, na nagkaroon umano ng DNA test.

Lumabas daw rito na si Jake ang ama ng anak ni Andi, at hindi si Albie.

Hindi naman ito itinanggi ni Jake.

Noong October 2016, kinumpirma niya sa publiko na siya ang ama ng panganay na anak ni Andi.

Sa ngayon ay masaya na si Albie sa piling ng kanyang partner na si Michelina at isa nilang anak.