Kumpirmado nang imbitado si Kathryn Bernardo sa kasal nina Dominic Roque at Bea Alonzo.

Ito’y kahit wala pang isinasapublikong petsa sina Dominic at Bea kung kailan magaganap ang kanilang pag-iisang dibdib, matapos nilang ma-engage noong July 18, 2023.

Sa ginanap na Luxe’s Beauty & Wellness Group Thanksgiving Party ngayong Sabado, January 20, 2024, natanong si Dominic ng entertainment press kung imbitado ba sina Kathryn at dati nitong nobyo na si Daniel Padilla sa kasal nila ni Bea.

Si Dominic ay kilalang malapit na kaibigan ng KathNiel.

Nasa iisang barkadahan sila na kung tawagin ay Nguya Squad, kasama ang iba pa nilang celebrity friends na sina Patrick Sugui, Marco Gumabao, Ria Atayde, Zanjoe Marudo, Joe Vargas, Alora Sasam, at Joshua Garcia.

Kasama rin sa grupo ang real-life couples na sina Khalil Ramos at Gabbi Garcia, at Sofia Andres at Daniel Miranda.

Ani Dominic, “Si Kath [invited].”

Sundot na tanong ng press, “Si Kath lang, kasi mas close ka sa kanya?”

Natatawang sagot ni Dominic, “Oo, kasi hindi pa naman kami okay ni DJ [Daniel].”

“I mean we’re not talking since 2020. We haven’t seen each other for the longest time since 2020.”

Maaari pa naman daw ito mabago lalo na’t hindi pa nailalatag nang maayos nina Dominic at Bea kung sinu-sino ang iimbitahan nila sa kanilang kasal.

Pero bukod kay Kathryn, kasama rin sina Marco, Khalil, at Patrick sa siguradong iimbitahan ni Dominic.

Walang binanggit si Dominic na dahilan kung bakit hindi maayos ang relasyon ng pagkakaibigan nila ngayon ni Daniel.

Ngunit matatandaan na noong September 2021, nang simulang mapansin ng netizens ang pag-iwas ni Dominic kay Daniel.

Bibihira na rin siyang makita na sumasama sa barkadahan nilang Nguya Squad.

Mas nagliyab pa ang usaping may alitan sila nang i-unfollow nila ang isa’t isa sa Instagram.

DANIEL AND DOMINIC FALLING OUT

Hindi natukoy kung kailan eksakto nagsimula ang alitan nina Daniel at Dominic, pero lumutang ito noong napaulat na magkarelasyon na sina Bea at Dominic.

Noong August 15, 2021, tinalakay sa vlog sa YouTube ni Ogie Diaz ang tungkol sa pag-unfollow nina Daniel at Dominic sa isa’t isa.

Ani Ogie, totoong may hindi pagkakaunawaan sina Dominic at Daniel kaya mas pinili nilang i-unfollow ang isa’t isa sa Instagram.

May lumabas pa noon na isyu na ginhost umano ni Dominic ang nakababatang kapatid ni Daniel na si Magui kaya nagalit sa kanya si Daniel.

Pero paglilinaw ni Ogie, “May nakausap ako. Hindi raw ganoon.

“Dahil sabi ng isang source ko, ‘Kuya Dom’ ang tawag sa kanya ng mga kapatid ni DJ [Daniel].”

Nagkaroon ng follow-up si Ogie tungkol sa isyung ito noong September 16, 2021.

Pero binanggit ni Ogie na in-unfollow na rin ni Karla Estrada si Bea, girlfriend ni Dominic.

Paniniwala noon ni Ogie, may kinalaman ang pag-unfollow ni Karla kay Bea dahil sa gap nina Daniel at Dominic.

May nakapagsabi rin daw kay Ogie na maliit ang tsansang magkabati pa sina Daniel at Dominic.

“Sa pagkakaalam ko, may nasabihan si Karla na isang tao na sinabi niyang si Dominic, malabo na silang magkaayos ni DJ,” kuwento ni Ogie.

Sinabi rin daw ng source ni Ogie na ang pag-unfollow ni Karla kay Bea ay posibleng may kinalaman sa pagiging close ni Karla kay Marjorie Barretto.

Si Marjorie ang ina ni Julia Barretto, girlfriend ngayon ni Gerald Anderson, na ex-boyfriend naman ni Bea.

Noong 2019, nag-break sina Bea at Gerald at itinurong third party umano si Julia.