Halos dalawang taon mula nang masawi sa car accident ang anak niyang si Andrei Sison, lalo raw tumitindi ang pangungulila at kalungkutan ng kanyang ama — ang dating aktor na si Marco Salvador (Alain Marco Sison sa tunay na buhay).

Si Andrei ay aspiring actor at contract star ng Sparkle GMA Artist Center, ang talent management arm ng GMA Network Inc.

Binawian siya ng buhay dahil sa malagim na car accident na nangyari sa harap ng New Intramuros Village sa Commonwealth Avenue, Quezon City, noong Marso 24, 2023.

Pumanaw si Andrei sa murang edad na 17.

MARCO SALVADOR STILL GRIEVING OVER DEATH OF SON ANDREI SISON

Si Andrei ang pang-apat sa limang anak ni Marco Salvador, na dating miyembro ng youth-oriented program na That’s Entertainment.

Apo siya ng veteran balladeer na si Marco Sison, ama ni Marco Salvador.

Hanggang ngayon, labis pa rin ang pagdaramdam ni Marco sa pagkawala ni Andrei.

Patunay nito ang makadurog-damdaming mga salita sa profile introduction niya sa Facebook: “waiting for you drei, sunduin mo na ako nak pls.”

Makikita rin sa mga Facebook post ni Marco ang mga larawan ni Andrei noong nabubuhay pa ito na palatandaang dinaramdam niya nang husto ang pagpanaw ng kanyang anak.

Larawan din nila ng yumaong anak ang ginamit na profile pic ni Marco.

Sa eksklusibong panayam ng Cabinet Files kay Marco ngayong Biyernes, Marso 14, 2025, binuksan niya ang puso at ibinahagi ang saloobin tungkol sa maagang pagkamatay ni Andrei.

Ramdam ang lungkot ni Marco nang sabihing, “Nung nawala si Andrei, madaming nagbago.

“Nawala yung anak ko at kaibigan. Nawala yung kapartner ko sa lahat ng bagay.

“Kasi kahit ang dami kong problema noon, isang yakap lang sa akin ni Drei, nawawala na lahat yon.

“E, ngayon wala na. Wala nang yayakap sa akin para maging okay ako.”

Inamin ni Marco na hanggang ngayon ay hindi pa rin niya matanggap na wala na ang kanyang anak.

Saad niya: “Hindi pa rin ako okay.

“Magtu-two years na siyang wala pero parang kahapon lang nangyari. Hindi nawawala yung sakit, nandiyan lang lagi.

“Ang ipinagkaiba lang, masasanay ka sa sakit. Mamamanhid ka na.

“Idinadaan ko na lang sa iyak para kahit papaano, e, mailabas ko yung sakit.”

MARCO SALVADOR’S FACEBOOK PROFILE INTRODUCTION

Marami ang nababahala sa Facebook profile introduction ni Marco na “waiting for you drei, sunduin mo na ako nak pls.”

Hiningi ng Cabinet Files ang paliwanag niya tungkol sa kanyang napakalungkot na mensahe para kay Andrei.

“Para matapos lang yung sakit na nararamdaman ko,” sabi ni Marco.

“Miss na miss ko na kasi yung mga kuwentuhan namin.

“Ako lang kasi ang mag-isang nagpalaki sa kanya kaya iba rin talaga yung mga pinagsamahan namin.

“Buntot ko yan, e. Kahit nasaan ako, kasama ko yan.”

Pilit daw nililibang ni Marco ang sarili para pansamantalang malimutan ang nararamdamang kalungkutan at depresyon.

“Nililibang ko na lang ang sarili ko,” pag-amin niya.

“Buti na nga lang, itong past few days, madalas niya akong dalawin sa panaginip.

“Sobrang saya ko. Minsan, ayaw ko na gumising para tuluy-tuloy lang kaming magkasama.”

Ano ang panalangin ni Marco ngayon sa Panginoong Diyos?

Sagot niya: “Ipinagdadasal ko lang lagi na palakasin Niya ang loob ko at sana, mas madalas Niyang padalawin sa panaginip ko si Drei.

“At sana, huwag maranasan ng ibang tao yung naranasan ko, kasi sobrang hirap at sobrang sakit.”

Kung nabubuhay ngayon si Andrei, magdiriwang siya ng kanyang ika-20 kaarawan sa Oktubre 9.

Pero maaga mang namatay, nananatiling buhay ang mga alaala niya sa puso at isipan ng mga nagmamahal sa kanya.

JOSH FORD REMEMBERS CAR CRASH WITH ANDREI, TWO OTHER FRIENDS

Muling nabuhay ang interes at pinag-usapan si Andrei dahil sa mga inilahad ni Josh Ford sa PBB Celebrity Collab Edition noong Miyerkules ng gabi, Marso 12.

Tanging si Josh ang nakaligtas sa apat na pasaherong sakay ng kotse na bumangga sa pader ng New Intramuros Village noong Marso 24, 2023.

Kasamang nasawi ni Andrei ang mga kaibigan nilang sina Paolo Bueza at Arman Velasco.

Iyak nang iyak si Josh nang magkuwento sa kauna-unahang pagkakataon tungkol sa naganap na aksidente na kumitil sa buhay ng kanyang mga kaibigan.