Binasag na ni Maggie Wilson ang pananahimik tungkol sa kasong adultery na isinampa sa kanya ng estranged husband na si Victor Consunji.

Ang itinuro ni Victor na kalaguyo umano ni Maggie ay ang Thai-British entrepreneur na si Tim Connor.

Si Victor ay may-ari ng real estate development company na VCDC, habang si Maggie ay dating beauty queen-host na may-ari ng interior design at furniture shop na Acasa Manila.

July 15, 2022 nang maisapubliko na may arrest warrant para kina Maggie at Tim dahil sa kasong adultery.

Nakasaad sa impormasyon mula sa piskalya ng Taguig City na December 2021, January 2022, at February 2022 ang mga insidente sa Taguig City kunsaan naganap ang pakikiapid umano ni Maggie kay Tim.

Ngayong Martes, July 26, 2022, matapang na sinagot ni Maggie ang aniya’y isa sa mga basehan ng akusasyon ni Victor sa kanya.

Base sa salaysay ni Victor, lumipad daw si Maggie sa Barcelona nang hindi kasama ang mister.

Pinalalabas umano na kinatagpo ni Maggie si Tom sa Barcelona trip na iyon.

Pero kontra ni Maggie, kasama si Victor sa kaisa-isang pagkakataong nakasama niya si Tim sa Barcelona halos isang taon ang nakararaan.

Mensahe ni Maggie kay Victor via Instagram Story (published as is):

“So you’re saying in your adultery allegation that your Schengen visa was still being processed and that myself and Tim went to Barcelona without you? Ok!

“Here’s a video that I posted on stories 47 weeks ago (which was viewed by 45k + people), of you laughing with us and smoking shisha at a cafe in Barcelona.

“I added it to my ‘Travel’ highlights so you can rewatch it.

“The name of the cafe is La Rose, which you can see in the background of the video.

“This was the ONLY time Tim was present in Barcelona with me/us.

“Just in case you forgot…”

MAGGIE SHOWS BARCELONA TRIP WITH VICTOR, TIM, AND FRANCESCA

Kasunod nito ay ipinakita ni Maggie ang mismong video kunsaan masayang nakaupo sa La Rose café si Victor kasama si Tim at ang noo’y girlfriend at business partner ni Tim na si Francesca Armstrong.

Hindi kita sa video si Maggie na siyang kumukuha ng video.

Dagdag na pahayag ni Maggie, “This allegation was one of the basis of getting an arrest warrant for the mother of your son.”

THE LEGAL BATTLE AND PROPERTY ISSUE

Noong Biyernes, July 15, 2022, lumabas sa mga pahayagan ang pagsampa ni Victor ng kasong adultery laban kay Maggie at sa alleged third party ng kanilang breakup na si Tim Connor.

Kasabay nito ang attempt ng kampo ni Victor na sapilitang paalisin si Maggie sa tirahan nito sa Taguig City.

Umalma naman si Maggie sa aniya’y “harassment and persecution” sa kanya ni Victor nang subukan ng tauhan nito at ibang mga kasama na i-padlock ang bahay ng dating beauty queen.

Nagpahiwatig din si Maggie, base sa post niya ng excerpt mula sa Philippine Commission on Women, na nagsasabing ang pagsampa ng kasong “adultery” ay ginagamit umanong “bargaining suits” sa legal battle ng estranged couple.

THE BREAKUP

September 2021 nang ianunsiyo ni Maggie na hiwalay na sila ng mister na si Victor matapos ang 11 taong pagsasama bilang mag-asawa.

Noong panahong iyon, sinabi ni Maggie na mutual ang desisyon nila ni Victor at nagkasundo silang mag-co-parenting sa kanilang unico hijo.

Pero nang mga sumunod na buwan, unti-unting umalma si Maggie sa isyu kaugnay ng di pagkakaunawaan nila ni Victor tungkol sa pagbisita niya sa anak nila.

Hanggang sa nito ngang Hulyo ay pumutok ang pagsampa ng kaso ni Victor laban kay Maggie.