Binasag na ni Richard Gutierrez ang kanyang katahimikan tungkol sa tunay na estado ng relasyon nila ni Barbie Imperial.

January 2024 nang unang namataang magkasama sa isang gastropub sina Richard at Barbie, pero naging tahimik ang dalawa tungkol sa napapabalitang pagkakamabutihan nila.

Pagkatapos nito ay naging sunud-sunod na ang sightings ng dalawa na magkasama — dito sa Pilipinas at maging sa South Korea at Italy.

RICHARD GUTIERREZ CLARIFIES BARBIE IMPERIAL NOT A “THIRD PARTY”

Sa vlog ni Ogie Diaz ngayong Huwebes, January 16, 2025, eksklusibong nakapanayam ng talent manager-reporter-vlogger si Richard.

Sa isang punto ng kanilang pag-uusap, tinanong ni Ogie si Richard tungkol sa real status nila ni Barbie.

Kahit daw kasi ilang beses na silang nakikitang magkasama sa publiko, hindi pa rin nila inaamin ang tunay na estado ng kanilang relasyon.

So, ano ba ang totoong estado nila ni Barbie?

Sagot ni Richard, “Siguro for now, like gaya nga ng sabi mo, nakikita naman ng mga tao.

“Doon muna tayo sa what you see is what you get sa amin ni Barbie.”

Kasunod nito ang paglilinaw niyang walang kinalaman si Barbie sa hiwalayan nila ng estranged wife niyang si Sarah Lahbati.

Saad ni Richard: “Ang gusto ko lang sigurong i-clarify doon sa mga tao is that si Barbie, walang kinalaman sa paghihiwalay namin ni Sarah.

“Hindi siya third party, hindi nag-overlap.

“Kasi maraming mga tao, yun nga, mga bashers na nagsasabi na siya ang dahilan.

“Wala siyang kinalaman.”

Dagdag pa niya, “Nakilala ko si Barbie, matagal na kaming nagkahiwalay ng landas ni Sarah.

“So, yun, gusto ko lang i-clarify.

“Siyempre kasi parang ang daming nagre-react sa kanya, ang daming mga nag-hate comment sa kanya.

“So siyempre, kailangan ko siyang protektahan. Kailangan ko rin i-clarify yun, di ba?”

RICHARD REVEALS ONGOING ANNULMENT PROCESS WITH SARAH LAHBATI

Kasunod ng paglilinaw niyang hindi third party si Barbie sa hiwalayan nila ni Sarah, sinabi ni Richard na ongoing na ang annulment process nila ng kanyang estranged wife.

Aniya: “Siguro yung tungkol sa amin ni Sarah, ayoko na rin pag-usapan, yung mga nangyaring detalye.

“Kasi, we are actually going through an annulment now.

“And both parties naman want to move forward.

“Actually, at this point, nakapag-move forward na yung both parties.

“May equal time kami with our kids. So, parang nagko-co-parenting kami.

“And ang priority namin is to make sure that the kids, you know, live a good life, a happy life.

“And of course, kung happy siya sa buhay niya, at happy ako sa buhay ko, makikita ng mga bata yun.

“At ang importante sa amin ay yung mga bata.

“So, kung ano man yung dahilan, matagal na panahon na yun, nakapag-move on na kami pareho, 2025 na.

“Gusto kong magsimula yung taon nang maganda, peaceful, at happy.

“So, yun, let’s leave the past in the past.

“We’re all trying to move forward.”

Read: Richard Gutierrez and Sarah Lahbati love story: A timeline

RICHARD ON BARBIE: “totoong-totoong tao.”

Samantala, naitanong din ni Ogie kay Richard kung ano ang naka-attract sa kanya kay Barbie.

Saad niya, “Si Barbie kasi totoong-totoong tao.

“What you see is what you get talaga rin sa kanya.

“Mabuting tao, maalaga.

“Nakikita mo na genuine yung intentions niya, genuine yung pagkatao niya.”

Paano niya nakilala si Barbie?

Ayon kay Richard, nagsimula ang lahat nang nagbukas ang gastropub sa Alabang kung saan pareho silang partners.

Lahad niya: “Doon nag-start yun actually, nung nag-open yung Tipsy Pig sa Alabang.

“Naging partner din ako doon, tapos partner din siya.

“And then, yun, lumabas kami dun, nag-meet kami dun. Kumbaga, doon kami pinagkakilala.

“Lumalabas kaming dalawa, nandun kami, nag-hangout kami with friends and other partners.

“And then, doon namin nakilala ang isa’t isa.

“And yun, masaya siyang kasama, enjoy kaming dalawa, and doon na nagsimula.”

Huling namataang magkasama sina Richard at Barbie sa Rome, Italy, noong September 2024.

Noong panahong iyon, nasa Italy si Richard para sa taping ng teleserye nila ni Daniel Padilla, ang Incognito.

Sa isang post sa Facebook, ibinahagi ng isang Filipino restaurant sa Rome na naging customer nila sina Richard at Barbie para sa isang tanghalian.

Pinaunlakan ng dalawa ang mga staff ng restaurant na nais magpakuha ng picture sa kanila.

Barbie Imperial and Richard Gutierrez spotted in Rome, Italy in September 2024

Wala pang reaksiyon si Barbie sa panayam kay Richard.