Tuluyan nang kinumpirma ni Sarah Lahbati na single na siya ngayon.

Ibig sabihin, totoo ang matagal nang usap-usapang hiwalay na sila ng asawang si Richard Gutierrez.

Naganap ang pag-amin ni Sarah nang makapanayam siya ng TV Patrol reporter na si MJ Felipe ngayong Biyernes, March 1, 2024.

Sa video na ini-upload ng ABS-CBN News, mapapanood ang diretsahang pagsagot ni Sarah sa tanong ni MJ kung siya ay single ngayon.

Ani Sarah, “Uhm, yeah. I mean, there’s nothing to hide and I think it’s pretty clear to the public that both of us are [single].”

Noong Martes, February 27, lang nang isapubliko ni Sarah na hindi na sila nag-uusap ni Richard.

Hindi na rin daw sila magkasama sa bahay at maging sa pagpapalaki sa dalawa nilang anak na sina Zion, 10, at Kai, 5.

“It’s not easy on any child but I’m here for them and they’re better,” paniniguro ni Sarah sa isang hiwalay na panayam.

Hindi man ito ang buhay na pinangarap ni Sarah, titiyakin daw nila ni Richard na mananatili silang mabuting magulang para sa dalawa nilang anak.

Ang kapakanan daw nina Zion at Kai ang una nilang isinasaalang-alang sa lahat ng desisyong gagawin nila.

Ani Sarah, “Well, of course, it’s not ideal for the children, let’s go back to the kids. But that’s life and that’ll be fine.

“We’re good at parenting and we have, you know, we are there for the kids. That’s all I’m gonna say.”

SARAH-RICHARD BREAKUP

Nagsimula ang espekulasyong may pinagdaraanan ang relasyon nina Sarah at Richard matapos mapansin ng mapanuring netizens na hindi na sila nagkakasama sa mga lakad nila.

Lalo pa’t kilala ang dalawang mapag-post ng kanilang family trips at bonding sa social media.

Mas tumindi pa ang intriga noong October 26, 2023, nang mag-post si Sarah sa Instagram ng video kasama ng dalawang anak nila ni Richard na sina Zion at Kai.

Wala sa video si Richard.

Nilapatan ni Sarah ang video ng kantang “i am not who i was” ni Charles Peña na may lyrics na “So, if I fly too far / Will I still have a place inside your heart? / And, when you see what I’ve become / Will you love me for who I am, not who I was?”

Wala rin si Richard sa picture ni Sarah at ng mga anak na nakasuot ng Halloween costumes habang sila ay nasa hardin ng isang bahay noong October 28.

November 2 at November 4, nag-update si Sarah ng bakasyon nila ng mga anak sa Camp Sirums, isang beach resort sa Siruma, Camarines Sur. Kapansin-pansin ding wala si Richard.