Hiwalay na nga ba ang magkasintahang Kyline Alcantara at Kobe Paras?

Ito ngayon ang tanong ng netizens matapos nilang mapansin ang pagde-delete umano ni Kobe sa ilang mga litrato nila ni Kyline sa Instagram.

Ayon sa mga masugid na tagahanga ni Kobe, mula sa 78 posts ng kilalang basketball player ay 76 na lang ito ngayon.

Photo/s: Screengrab on TikTok

Photo/s: Screengrab on TikTok

May dalawa raw na litratong binura si Kobe. Ang dalawang ito ay pinaghihinalaang pictures nila ni Kyline.

Isa na raw rito ang kuhang larawan ng dalawa habang sila’y nasa isang restaurant sa Makati City— base sa location na nakalagay sa post ni Kobe.

Photo/s: Screengrab kobe_paras_fanpage on TikTok

Ang natitirang isa pa ay ang kuhang larawan ng dalawa nang sila’y nagbakasyon sa Palawan noong December 2024.

Sa litratro makikita ang dalawa na nakasakay sa isang bangka habang nakahalik sa pisngi ni Kyline si Kobe.

Kyline Alcantara and Kobe Paras are having a sweet time in Palawan. 
Photo/s: Screengrab GMA Network on Facebook

Kung bibisitahin ngayon, April 11, 2025, ang Instagram feed ni Kobe ay makikitang wala na nga ang nasabing dalawang post niya noon na kasama si Kyline.

May panaka-nakang videos pa rin na naka-upload sa kanyang Instagram pero kuha na ito sa brand events na dinaluhan nilang magkasama ng Kapuso actress.

 

Ganito rin ang makikita sa Instagram feed ni Kyline. Tanging ang mga brand collab at events na pinuntahan na lang nila ni Kobe ang makikita sa kanyang IG.

Base sa fans ni Kyline, nagbura rin ang aktres ng mga picture na kasama niya si Kobe.

Hindi pa maisa-isa sa ngayon kung ano ang dinelete ni Kyline, ngunit may ilang netizen ang nakapansin na wala na ang litrato nila ni Kobe sa post niya noong January 26, 2025.

Kuha ito noong sila’y nasa Los Angeles, California habang nanunuod ng NBA [National Basketball Association] Game.

Kyline Alcantara watched the NBA Game with Kobe Paras. 
Photo/s: Kapuso PR Girl on Facebook

Gayunpaman, nananatili pa ring nasa following list nina Kobe at Kyline ang isa’t isa.

Hindi malinaw kung naglinis lang sila ng IG feed, at kung wala ngang ibang dahilan ang natanggal na mga post.

Kyline Alcantara still follows Kobe Paras on Instagram. 
Photo/s: Screengrab @Instagram

Kobe Paras still follows Kyline Alcantara on Instagram. 
Photo/s: Screengrab @Instagram

KOBE CONFIRMS DATING KYLINE

Mailap si Kyline sa mga interbyu na naitatanong kung ano ang estado ng relasyon nila ni Kobe.

 

Hanggang noong November 1, 2024, sa Cosmo Confession na lumabas sa YouTube channel ng Cosmopolitan Philippines, inamin ni Kobe na “dating” ang estado ng relasyon nila ni Kyline.

Dito kasi ay natanong ang binata kung sino ang kanyang “biggest celebrity crush.”

Aniya, “Kyline Alcantara, because we are dating.”

Sundot na tanong sa kanya, “When did you realize that you had a crush on her?”

Nakangiti ngunit tipid na sagot ni Kobe, “Early this year.”

 

KYLINE-KOBE SIGHTINGS

May 19, 2024, nang magsimula pag-usapan kung may namamagitan kina Kyline at Kobe.

Ito’y matapos mapansin ng mapanuring netizens ang pagkakahawig ng larawang ipinost nila sa kani-kanilang Instagram account.

Nag-post noon si Kyline sa Instagram ng mga larawang kuha niya, habang siya ay kumakain. Kabilang sa in-upload niya ang larawan ng mga chef sa loob sa isang kilalang restaurant sa Makati City.

Tanging smiling face with hearts emoji ang inilagay na caption dito ni Kyline.

Ang interior ng restaurant na kinainan niya ay nahahawig naman sa Instagram Stories na ipinost ni Kobe noong araw ring iyon.

Makikita rito ang picture ng nakatayong chefs sa kitchen area habang may dalawang wine glass at bulaklak sa lamesa.

Walang kahit na anong caption na inilagay si Kobe.

 

Ang pagkikita ng dalawa ay nasundan pa noong May 30 nang i-repost ni Kobe sa kanyang Instagram Story ang picture ni Kyline, kasunod ng pag-comment niya sa mga post ng Kapuso actress.

 

June 25, muling naaktuhan ang dalawa na magkasamang naglalakad sa isang lugar sa Bonifacio Global City (BGC) sa lungsod ng Taguig.

Ayon sa impormante ng PEP.ph (Philippine Entertainment Portal), galing sina Kyline at Kobe sa isang bar sa BGC nang makunan sila ng video at picture.

 

Sa eksklusibong panayam ng PEP kay Kobe sa red carpet ng GMA Gala 2024, natanong siya tungkol sa tunay na estado nila ni Kyline.

Tanong ng PEP, bakit ang kapatid niyang si Andre Paras ang kasabay sa red carpet, at hindi ang sinumang ka-date niya?

“I got invited last minute, so I don’t know, sino ba ito?” pag-iwas niya.

Sa puntong ito ay diretsahan nang tinanong ng PEP si Kobe kung bakit hindi niya sinamahan si Kyline.

Sagot ng basketbolista, “fanboy” lang siya ng aktres sa gabing iyon.

“For tonight, I’m just a boy who is a fan.

“And, you know, I think this is her first time walking alone. So, you know, she deserves every spotlight.

“And I know tonight she’s gonna look amazing,” pahayag ni Kobe.

 

July 27, muling naispatan si Kyline na kasama ang pamilya ni Kobe—partikular na ang ama ni Kobe na si Benjie Paras at ang nakatatandang kapatid na si Andre. Kasama ni Andre ang non-showbiz girlfriend, ang swimmer na si Honey Escarez.

 

Pagsapit ng August 27, muling nag-viral online sina Kobe at Kyline nang makunan ng video si Kyline na nakakandong kay Kobe habang sila’y nagkakasiyahan sa pagbi-videoke.

Bakas ang sweetness ng dalawa. Sa isang punto ay hinalikan pa ni Kobe ang balikat ng aktres habang nakakandong ito sa kanya.

 

September 19, hindi nakaligtaang batiin ni Kyline si Kobe nang magdiwang ito ng ika-27 na kaarawan.

 

September 26, isinapubliko nina Kyline at Kobe ang una nilang pagsasamahang mini-series na Miss Legends.

 

Pagdating ng December 4 nakapanayam ng PEP sina Kyline at Kobe sa isang event.

Dito inamin ni Kyline na naipakilala na niya si Kobe sa kanyang mga magulang na sina Butch at Rowena Alcantara.

Sabi ni Kyline noon, “Para sa akin, importante talaga na makilala ni Kobe yung pamilya ko at makilala ng pamilya ko si Kobe para malaman nila kung ito ba yung tama para sa akin. Ito pala yung real deal.”

 

Samantala, habang sinusulat ang artikulong ito ay walang kumpirmasyon mula sa kampo nina Kyline at Kobe kung totoo ang haka-hakang hiwalay na sila.